Ինքնիշխանության ամրապնդման տարի էր, Հայաստանն իր կախվածությունը նվազեցրեց ՌԴ-ից․ Հովսեփ Խուրշուդյան. ՏԵՍԱՆՅՈՒԹ

2024 թվականը լի էր վայրիվերումներով, արտաքին ու ներքին քաղաքական խմորումներով։ Ինչո՞վ այն առանձացավ․ Factor TV-ի բլից-հարցերին պատասխանում է «Ազատ քաղաքացի» ՀԿ ղեկավար Հովսեփ Խուրշուդյանը։ 

-2024-ը Հայաստանի համար ինչպե՞ս կբնորոշեք։

-Կարևոր ձեռքբերումների, ինքնիշխանության ամրապնդման տարի էր։ Հայաստանն էապես իր կախվածությունը նվազեցրեց Ռուսաստանից․ ՀՀ-ից դուրս բերվեցին օդանավակայանում կանգնած ԱԴԾ զորքերը, հայ-ադրբեջանական սահմանից դուրս բերվեցին 27 ռուսական ռազմակայանները։ Մեղրիից դուրս բերվեցին ԱԴԾ վերահսկողության ծառայողները՝ հայ-իրանական և հայ-թուրքական սահմանից, պայմանավորվածություն ձեռք բերվեց, համենայն դեպս, հունվարի 1-ից արդեն համատեղ վերահսկողություն կիրականացվի, և դա նշանակում է՝ հիմք կստեղծվի, որ երբ պետք լինի, նաև այդտեղից դուրս կբերվեն ռուսական ԱԴԾ-ի սահմանապահները։ 

–Ինչ՞ սպասել Հայաստանի քաղաքական դաշտում 2025 թվականին։  

-Պետք է շարունակել սկսած կարևոր գործընթացը, պետք է վավերացնել Եվրաքվեի նախաձեռնած օրենսդրական նախաձեռնությունն ԱԺ-ում։ Պետք է  սկսել ավելի կայուն քայլեր՝ Արևմուտքի հետ ռազմաքաղաքական դաշինքներ կնքելու ուղղությամբ։ Նախորդ տարվա կարևոր ձեռքբերումներից էր նաև զենքի մատակարարումների դիվերսիֆիկացիան, բացի Հնդկաստանից՝ այդտեղ ավելացավ շատ ավելի մեծ ծավալներով Ֆրանսիան, ասում են նաև՝ Միացյալ Նահանգները։ Մենք տեղյակ ենք նաև այլ երկրների մասին։ Ուզում եմ ասել, որ դա պետք է շարունակել նաև այս տարի, բայց պակաս կարևոր չէ, որ սեփական ռազմարդյունաբերությունը պետք է սկսել ավելի թափով զարգացնել։

Մանրամասները՝ տեսանյութում։

Անի Թամրազյան