19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
«Արմավիր» ՔԿՀ-ում Հ. Թումանյանի «Անխելք մարդը» ներկայացման հանդիսատեսը ազատազրկված անձանց երեխաներն էին
Հասարակություն
27.12.2024 | 13:39
Ամանորին ընդառաջ՝ ՀՀ ԱՆ «Արմավիր» քրեակատարողական հիմնարկի ինքնագործ մշակութային միավորման անդամ ազատազրկված անձանց նախաձեռնությամբ և մասնակցությամբ տեղի է ունեցել Հ. Թումանյանի «Անխելք մարդը» հեքիաթի բեմականացումը․ տեղեկացնում են ՔԿԾ-ից։
Ինքնագործ մշակութային միավորման նախագահ, հեքիաթի հերոսի՝ Անխելք մարդու դերակատար Մուշեղ Մխիթարյանը, անդրադառնալով բեմադրությանը, նշել է, որ «Անխելք մարդը» հեքիաթի ընտրությունը պատահական չի եղել, այն ունի ուսուցողական մեծ խորհուրդ. քրեակատարողական հիմնարկներում գտնվող ազատազրկված անձանցից շատերն անազատության մեջ են հայտնվել հատկապես իրենց անխելքության պատճառով:
Հանդիսատեսի շարքերում եղել են նաև ազատազրկված անձանց հարազատներն ու երեխաները: Վերջիններս մեծ հետաքրքրությամբ դիտել են ներկայացումը և ընթացքում մանկական ոգևորվածությամբ պատասխանել դերասանի հարցերին:
Անազատության մեջ գտնվող ծնողները երեխաների համար պատրաստել էին ամանորյա անակնկալ. ներկայացման ավարտին այցելել է Ձմեռ պապը և իր շուրջ հավաքել մանուկներին: Փոքրիկները մեծ խանդավառությամբ պատասխանել են Ձմեռ պապի հարցերին, արտասանել, երգել և պարել իրենց սիրելի հյուրի հետ: Տոնական, ուրախ մթնոլորտն ավելի է ոգևորել փոքրիկներին, երբ Ձմեռ պապը նրանց նվերներ է բաժանել:
Փոքրիկ հանդիսատեսի համար անակնկալ էր պատրաստել նաև Քրեակատարողական ծառայությունը. Պատանի հանդիսատեսի թատրոնի հետ համագործակցության արդյունքում Ձմեռ պապի միջոցով երեխաներին են փոխանցվել «Հենզելի և Գրետելի ամանորյա արկածները» ներկայացման հրավիրատոմսեր:
