08.10.2026 | 16:21
Հայտնի է՝ ինչու է Արթուր Ալեքսանյանը բաց թողնելու աշխարհի առաջնությունը
ՌԴ-ում 7 օդանավակայան է փակվել ԱԹՍ-ի հարձակման սպառնալիքի պատճառով
Քաղաքականություն
27.12.2024 | 12:23
Դեկտեմբերի 27-ի առավոտյան ռուսական յոթ օդանավակայաններում ինքնաթիռների մեկնման և ժամանման ժամանակավոր արգելք է մտցվել, հայտնում են ռուսական գործակալությունները և Telegram ալիքները։ Ընդհանուր առմամբ, սահմանափակումներն ազդել են յոթ շրջանների վրա, գրում է DW-ի ռուսական ծառայությունը:
Մոսկվայի ժամանակով 05:00-ին Սոչիի օդանավակայանում սահմանափակումներ են մտցվել, ասել է Ռոսավիացիայի ներկայացուցիչ Արտյոմ Կորենյակոն։
«Ինքնաթիռների անձնակազմերը, ավիադիսպետչերները և օդանավակայանի ծառայությունները ձեռնարկում են բոլոր անհրաժեշտ միջոցները՝ թռիչքների անվտանգությունն ապահովելու համար, սա առաջնահերթ խնդիր է»,- ասել է նա։
Օդանավակայանի մամուլի ծառայությունից հաստատել են, որ 12 ինքնաթիռներ ուղղորդվել են այլընտրանքային օդանավակայաններ, մի քանի թռիչքներ հետաձգվել են։
Նմանատիպ սահմանափակումներ են մտցվել Կազանի օդանավակայանում առավոտյան ժամը 6-ից։
Դեկտեմբերի 27-ի գիշերը ժամանակավոր սահմանափակումներ են մտցվել նաև Աստրախանի և Վոլգոգրադի օդանավակայաններում։ «Ռոսավիացիան» հայտնում է, որ Մոսկվայի ժամանակով 06:40-ից դրանք աշխատում են բնականոն հունով։ Baza տելեգրամյան ալիքը պնդում է, որ «Գորգ» պլանը՝ փակ երկնքի ռեժիմը, ներդրվել է նաև Սամարայի, Գրոզնիի և Մախաչկալայի օդանավակայաններում։
Ուկրաինայում պատերազմի սկզբից ի վեր ռուսական օդանավակայաններում թռիչքների սահմանափակումներ հաճախ են սահմանվում ուկրաինական անօդաչու թռչող սարքերի հարձակումների պատճառով։ Ռուսաստանի ՊՆ-ն հայտնել է, որ գիշերը ռուսական հակաօդային պաշտպանությունը 13 անօդաչու թռչող սարք է խոցել Բրյանսկի, Կուրսկի, Բելգորոդի, Տուլայի և Աստրախանի շրջանների տարածքում։
Թարգմանությունը՝ Տաթև Ֆռանգյանի
