Քաղաքականություն
26.12.2024 | 16:49
Սիրիայում նոր իշխանությունները հայտարարել են, որ տապալված նախագահ Բաշար Ասադի կողմնակիցները երկրի արևմուտքում սպանել են Ներքին գործերի նախարարության 14 զինծառայողների, գրում է BBC-ն։
Ըստ նրանց՝ ևս 10 զինծառայող վիրավորվել է երեքշաբթի միջերկրածովյան Տարտուս նավահանգստի մոտ մարտերի ժամանակ, որն Ասադի փոքրամասնության ալևիների հենակետն է: Նշվում է, որ անվտանգության ուժերը դարանակալել են նախկին սպային՝ կապված մայրաքաղաք Դամասկոսի մոտ գտնվող տխրահռչակ Սեյդնայա բանտում ունեցած դերակատարման հետ:
Մեծ Բրիտանիայում տեղակայված Մարդու իրավունքների սիրիական դիտորդական խումբը (SOHR) հայտնել է, որ երեք «զինված անձինք», որոնց ինքնությունը չի պարզվել, նույնպես սպանվել են բախումների ժամանակ: SOHR-ը հավելել է, որ ավելի ուշ անվտանգության ուժերը համալրումներ են տարել։
Սիրիական իշխանությունները կենտրոնական Հոմս քաղաքում գիշերվա ընթացքում պարետային ժամ են սահմանել։
Հաղորդվում է, որ սա հաջորդել է անկարգություններին, որոնք առաջացել են տեսագրության պատճառով, որտեղ, իբր, երևում է հարձակում ալևիների սրբավայրի վրա: Ներքին գործերի նախարարությունը հայտնել է, որ կադրերը հին են, և որ բռնություններն իրականացվել են անհայտ խմբերի կողմից:
SOHR-ը նաև հայտնել է, որ Հոմսում մեկ ցուցարար է զոհվել, հինգը՝ վիրավորվել:
Ցույցեր են տեղի ունեցել նաև Տարտուս և Լաթաքիա քաղաքներում, ինչպես նաև Ասադի հայրենի Քարդահայում:
Նախկին սպաները հրաժարվում են հանձնել զենքերը, իսկ որոշ քաղաքներում տեղի բնակիչներն ասել են, որ ցանկանում են հակահարված տալ, ինչը, ըստ երևույթին, տեղի է ունեցել Տարտուսում:
Ալևիների կրոնական առաջնորդները կոչ են արել համընդհանուր համաներում հայտարարել ալևիների համար, սակայն դա քիչ հավանական է համայնքի անդամների կողմից կատարված բազմաթիվ ռազմական հանցագործությունների պատճառով, ասվում է հրապարակման մեջ:
Թարգմանությունը՝ Էմմա Չոբանյանի
