Իսրայելը հարվածներ է հասցրել Գազային. հաղորդվում է տասնյակ զոհի մասին

Չորեքշաբթի լույս հինգշաբթի գիշերը Գազայի հատվածին Իսրայելի հարվածների հետևանքով զոհվել է առնվազն տասը մարդ, այդ թվում՝ հինգ լրագրող։ Այս մասին հայտնել են ՀԱՄԱՍ-ի կողմից վերահսկվող Գազայի առողջապահական մարմինների ներկայացուցիչները, փոխանցում է VOA-ն։

Բժիշկները հայտնել են, որ Գազա քաղաքի Զեյթուն թաղամասում գտնվող բնակելի շենքի վրա իսրայելական ավիահարվածի հետևանքով զոհվել է հինգ մարդ, վիրավորվել՝ 20-ը։ Նշվել է, որ զոհերի թիվը կարող է ավելանալ, քանի որ շատ մարդիկ մնացել են փլատակների տակ:

Մեկ այլ միջադեպի հետևանքով էլ հինգ լրագրող է սպանվել․ նրանց մեքենան գնդակոծվել է Գազայի կենտրոնական Նուսեյրաթ քաղաքի ալ-Աուդա հիվանդանոցի մոտ։ Նրանք Al-Quds Al-Youm հեռուստաալիքի աշխատակիցներ էին։ Պաղեստինյան ԶԼՄ-ները և տեղի լրագրողները հայտնել են, որ մեքենան նշված է եղել որպես մամուլի փոխադրամիջոց, լրագրողներն այն օգտագործել են հիվանդանոցից և Նուսեյրաթ ճամբարից ռեպորտաժներ անելու համար:

Իսրայելական բանակը հայտնել է, որ իր օդուժը «նպատակային հարված» է հասցրել մեքենային՝ հավելելով, որ դրանում եղել են «Իսլամական ջիհադ» զինյալ խմբավորման անդամներ։

ՀԱՄԱՍ-ն ու Իսրայելը չորեքշաբթի փոխանակվեցին մեղադրանքներով՝ նշելով, որ չեն կարողացել հրադադարի համաձայնության հասնել՝ չնայած վերջին օրերին երկու կողմից արձանագրված առաջընթացին:

Միևնույն ժամանակ, Գազայի առողջապահության նախարարը չորեքշաբթի հայտնել է, որ նորածին է ցրտահարվել անկլավի հարավում: Վերջին օրերին սա արդեն երրորդ նմանատիպ դեպքն է, երբ ցրտից երեխա է մահանում։

Թարգմանությունը՝ Տաթև Ֆռանգյանի