14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Պետք չէ զարմանալ՝ ընտրողների ցուցակներում մահացածների անուններ տեսնելիս. Մնացական Բիչախչյան. ՏԵՍԱՆՅՈՒԹ
Քաղաքականություն
21.09.2018 | 19:30
Երևանի ավագանու արտահերթ ընտրություններին ընդառաջ ոստիկանությունը հրապարակել է ընտրողների նախնական ցուցակները, ըստ որոնց սեպտեմբերի 3-ի դրությամբ ընտրողների թիվը կազմել է 850.124, վերջնական ցուցակների հրապարակման դրությամբ այն նվազել է՝ հասնելով 848.343-ի։
Factor.am-ի հետ զրույցում այս մասին ասաց ՀՀ ոստիկանության անձնագրային և վիզաների վարչության պետ Մնացական Բիչախչյանը: «Ընտրողների վերջնական ցուցակներում ընդգրկված են նաև 7741 անձինք, որոնք ՀՀ քաղաքացիներ չեն: Ընտրողների նվազման հանգամանքը պայմանավորված է ինչպես հաշվառման հասցեների փոփոխությամբ, այնպես էլ մահացություններով, որոնք դուրս են բերվել ընտրողների ռեգիստրից՝ բնականաբար նրանց անձնագրերը անվավեր ճանաչելով»,- պարզաբանեց Մնացական Բիչախչյանը:
Ոստիկանության պաշտոնյան հիշեցրեց, որ մինչև ընտրողների ցուցակների հրապարակումը ոստիկանապետ Վալերի Օսիպյանը հանձարարել էր այցելել քաղաքացիների բնակարաններ՝ ընտրողների ցուցակների ճշգրտման ուղղությամբ աշխատանքներ իրականացնելու համար:
«Այդ ընթացքում ոստիկանների կողմից հայտնաբերվեցին 614 մահացած անձանց տվյալներ, որոնք հանված չէին պետական ռեգիստրից: Դրանք հիմնականում այն քաղաքացիներն էին, որոնք մահացել են օտարերկրյա պետություններում և մահվան մասին տեղեկատվությունը իրավասու մարմիններին հասու չեն եղել»,- ներկայացրեց մեր զրուցակիցը:
Մեր հարցին՝ ցուցակներում քաղաքացիները կարո՞ղ են հանդիպել իրենց մահացած մտերիմների, ծանոթների կամ հարևանների անուններին, ոստիկանության անձնագրային և վիզաների վարչության պետն ասաց՝ այո:
«Հանրությունը պետք է մեկընդմիշտ իր մեջ ունենա այն գիտակցումը, որ այդ մահացած անձանց տվյալները ոստիկանությունը չի խցկում ընտրողների ցուցակներ, այդպիսի բան չկա և չի կարող լինել, դա կլիներ հանցագործություն: Այդ տվյալները պարզապես մնացել են ընտրողների ցուցակներում տարբեր պատճառներով»,- վստահեցրեց Մնացական Բիչախչյանը:
Հարցազրույցն ամբողջությամբ՝ տեսանյութում:
Շողիկ Գալստյան
