Տեղի է ունեցել ՀՀ-ում մարդկանց թրաֆիքինգի և շահագործման դեմ պայքարի հարցերով խորհրդի աշխատանքային խմբի հանդիպումը

Մարդկանց թրաֆիքինգի ոլորտում գործունեություն իրականացնող շահագրգիռ գերատեսչությունների և հասարակական կազմակերպությունների ներկայացուցիչների մասնակցությամբ այսօր տեղի է ունեցել ՀՀ-ում մարդկանց թրաֆիքինգի և շահագործման դեմ պայքարի հարցերով խորհրդի աշխատանքային խմբի հանդիպումը․ ամփոփվել են 2024 թ․ իրականացված աշխատանքները․ տեղեկացնում են ՆԳՆ-ից։

Քննարկման ընթացքում բացման խոսքով հանդես են եկել ՀՀ աշխատանքի և սոցիալական հարցերի նախարարի տեղակալներ Տաթևիկ Ստեփանյանը և Ռուբեն Սարգսյանը, ինչպես նաև ՀՀ ներքին գործերի նախարարի տեղակալ Արմեն Ղազարյանը։ Վերջիններս անդրադարձել են նաև ոլորտում առկա մարտահրավերներին և ներկայացրել դրանց լուծմանն ուղղված հետագա քայլերը։

ԱՍՀ նախարարության հավասար հնարավորությունների ապահովման վարչության մարդկանց թրաֆիքինգի և կանանց հիմնահարցերի բաժնի պետ Սոֆի Բոստանչյանը ներկայացրել է Մարդկանց թրաֆիքինգի և շահագործման զոհերի նույնացման հանձնաժողովի կողմից 2024 թվականի ընթացքում իրականացրած աշխատանքները։ Այս համատեքստում կարևորվել է շարունակական ջանքերի ներդրման անհրաժեշտությունը՝ սահմանված առաջնահերթությունների իրականացման գործում։

ՀՀ գլխավոր դատախազության և ՀՀ քննչական կոմիտեի ներկայացուցիչներն անդրադարձել են Հայաստանի Հանրապետությունում 2024 թվականի ընթացքում մարդկանց թրաֆիքինգի կամ շահագործման դեպքերով նախաձեռնված քրեական վարույթների և իրականացված աշխատանքներին։ Աշխատանքային խմբի մասնակցությամբ քննարկվել են ԱՄՆ պետքարտուղարության զեկույցի հարցաշարին առնչվող մի շարք հարցեր։

Աշխատանքային խմբի մասնակիցները բարձրաձայնել են հարցեր՝ ԼՂ-ից բռնի տեղահանված անձանց, ինչպես նաև Հնդկաստանի քաղաքացիների աշխատանքային իրավունքի իրացման առնչությամբ, ինչին ի պատասխան տրամադրվել է մանրամասն տեղեկատվություն՝ ներկա իրավիճակի և նախատեսվող կարգավորումների վերաբերյալ։