25.12.2024 | 22:59
Վթար Երևան-Երասխ ավտոճանապարհին․ կա տուժած
Էրդողանը շնորհավորել է Միխեիլ Ղավելաշվիլիին Վրաստանի նախագահի պաշտոնում ընտրվելու կապակցությամբ
Քաղաքականություն
25.12.2024 | 20:13
Թուրքիայի նախագահ Ռեջեփ Թայիփ Էրդողանը շնորհավորել է Միխեիլ Ղավելաշվիլիին Վրաստանի նախագահի պաշտոնում ընտրվելու կապակցությամբ, փոխանցում է Newsgeorgia-ն։
«Հաջողություն եմ մաղթում Ձեզ այս պատվաբեր պարտականությունը կատարելու գործում։ Լիովին վստահ եմ, որ Ձեր պաշտոնավարման ընթացքում մենք կշարունակենք զարգացնել բարեկամական հարաբերությունները և սերտ համագործակցությունը մեր երկրների միջև, ինչը բխում է մեր ընդհանուր շահերից և ծառայում է տարածաշրջանի բարգավաճմանը»,- նշել է Էրդողանը։
Այս պահին, Թուրքիայի նախագահից բացի, Ղավելաշվիլիին շնորհավորել են Ադրբեջանի, Հայաստանի, Սերբիայի և Բելառուսի ղեկավարները։
Նախկին ֆուտբոլիստ և պատգամավոր Միխեիլ Ղավելաշվիլին նախագահի միակ թեկնածուն էր. խորհրդարանական ընտրություններից հետո նա ընտրվել է դեկտեմբերի 14-ին «Վրացական երազանքի» ներկայացուցիչներից կազմված ընտրական կոլեգիայի կողմից։
Գործող նախագահ Սալոմե Զուրաբիշվիլին, որի պաշտոնավարման ժամկետը լրանում է դեկտեմբերի 29-ին, ինչպես նաև ընդդիմությունը և քաղհասարակության զգալի հատվածը հոկտեմբերի 26-ի խորհրդարանական ընտրությունները համարում են կեղծված, իսկ նոր խորհրդարանը և նրա ընտրած կառավարությունն ու նախագահին՝ ոչ լեգիտիմ։ Բողոքի ցույցերը երկրում շարունակվում են արդեն երկու ամիս։ Դրանք կտրուկ ակտիվացել են նոյեմբերի 28-ից հետո, երբ երկրի վարչապետ Իրակլի Կոբախիձեն հայտարարեց, որ կառավարությունը սառեցնում է ԵՄ-ին անդամակցելու շուրջ բանակցությունները մինչև 2028 թվականը։
Ղավելաշվիլիի երդմնակալության արարողությունը նախատեսված է դեկտեմբերի 29-ին։ Բողոքի ակցիաների գագաթնակետը սպասվում է այդ օրը։ Նախագահ Զուրաբիշվիլին հայտարարել է, որ հրաժարական չի տա։ «Վրացական երազանք»-ը նրան սպառնացել է հնարավոր ձերբակալությամբ։
Թարգմանությունը՝ Տաթև Ֆռանգյանի
