«Ծեծից ուշաթափվում էի, սպառնում էր սպանել»․ ՄԻԵԴ-ն ընտանեկան բռնության դեպքով առաջին վճիռն է կայացրել ընդդեմ ՀՀ-ի. ՏԵՍԱՆՅՈՒԹ

38-ամյա Հասմիկ Խաչատրյանն այսօր դառը ժպիտով է հիշում ամուսնու կողմից ծեծի և խոշտանգման 9 երկար ու ձիգ տարիների մասին։ Ամուսնության հենց առաջին ամիսներից սկսված հոգեբանական և ֆիզիկական բռնությունները Հասմիկին անվերջանալի էին թվում։

Կնոջ խոսքով՝ հոգեբանական բռնությանը կամաց-կամաց հաջորդել էր ֆիզիկականը։  Բռնարար ամուսինը սկսել էր ազատություն տալ բռունցքներին՝ ծեծի անունը «խանդ» դնելով։

Ծեծից և բռնությունից անմասն չէին մնում նաև մանկահասակ երեխաները, ինչին հաջորդում էին զղջման խոսքերն ու խոստումները։ 

Հասմիկի խոսքով՝ 9 տարվա ընթացքում պարբերաբար փախուստի է դիմել տնից, սակայն ամուսնու սպառնալիքներից վախենալով՝ վերադարձել է։ Սպառնալիքն իրական էր համարում․ ինչպես Հասմիկն է ասում՝ ամուսնու ընտանիքը պատահական մարդ չէր՝ Սարգիս Հակոբյանը լայն ճանաչում ունեցող բախտագուշակ Վարսիկի տղան էր։

Ի վերջո, Հասմիկի համբերության բաժակը լցվում է 2013 թվականի մայիսին, երբ  հերթական դաժան ծեծից հետո ուշաթափվում է։ Տան պայմաններում բուժում էր ստանում, երբ դարձյալ բռնության է ենթարկվում ամուսնու կողմից և գիշերով՝ հողաթափերով փախնում է տնից՝ այս անգամ վերջին անգամ։ Բռնությունը տեղափոխվել էր տան պատերից դուրս։

Սակայն Հասմիկն այս անգամ չհանձնվեց և դիմեց դատարան, սակայն ապարդյուն։   Վերաքննիչ և Վճռաբեկ դատարաններում ևս որևէ արդյունքի չհասնելուց հետո, Հասմիկը դիմեց Մարդու իրավունքների եվրոպական դատարան։ Ավելի քան 10 տարվա քննությունից հետո՝ ստրասբուրգյան դատարանը նախորդ շաբաթ հրապարակեց վճիռը։

ՄԻԵԴ-ն արձանագրել է, որ նախաքննության և դատավարության ընթացքում Հասմիկն իշխանություններին հայտնել է նախկին ամուսնու սպառնալիքների և բռնությունների մասին՝ խնդրելով պաշտպանել իրեն, սակայն ՀՀ-ն պատշաճ քայեր չի ձեռնարկել։

ՄԻԵԴ-ը Հայաստանի կառավարությանը պարտավորեցրել է բռնության ենթարկված կնոջը վճարել 26 000 եվրո փոխհատուցում, որից 24 000 եվրոն՝ ոչ նյութական վնասի, իսկ 2000 եվրոն՝ դատական ծախսերի համար:

Ուշագրավ է, որ Հասմիկին նկատմամբ բռնություն կիրառած բայց չդատապարտված Սարգիս Հակոբյանը հետագայում ծնողներին ծեծի ենթարկելու համար ձերբակալվեց։ Նա կրկին ամուսնացավ․  բռնության ենթարկվելու մասին ահազանգել է նաև երկրորդ կինը։ Հակոբյանն այսօր կալանավորված է։ 

Մանրամասները՝ տեսանյութում։

Ռոզա Վարդանյան