Ռուսական Ursa Major նավը խորտակվել է Միջերկրական ծովում պայթյունից հետո

Ռուսական Ursa Major առևտրային նավը խորտակվել է՝ Իսպանիայի և Ալժիրի միջև միջազգային ջրերում տեղի ունեցած պայթյունից հետո, հայտնում են El Español-ը և La Verdad-ը։ Անձնակազմի երկու անդամներ անհետ կորել են, մնացած 14-ին հաջողվել է փրկել և տեղափոխել իսպանական Կարտախենա քաղաք, գրում է Current Time-ը։

Պայթյունը տեղի է ունեցել շարժիչային սենյակում, երբ Ursa Major-ը շարժվում էր դեպի արևելք՝ Ջիբրալթարի նեղուց: Mediazona-ն հիշեցնում է, որ «Sparta» և «Ursa Major» բեռնատար նավերը երկար տարիներ բեռներ են տեղափոխել՝ Սիրիայում ռուսական զորախմբի մատակարարման համար։

Ursa Major-ը Սանկտ Պետերբուրգից մեկնել է դեկտեմբերի 11-ին և շարժվել դեպի Վլադիվոստոկ, ուր պետք է ժամաներ հունվարի 22-ին՝ ըստ «Marine Traffic» նավի հետագծման ծառայության տվյալների: Նավապետը հայտարարել է, որ վթարի պահին այն տեղափոխում էր դատարկ բեռնարկղեր։

Այնուամենայնիվ, խորտակվելուց չորս օր առաջ «Օբորոնլոգիստիկս»-ի մամուլի ծառայությունը զեկուցել է, որ Ursa Major-ն ուղարկվել է Հեռավոր Արևելք «խոշոր նախագծային բեռներով՝ որպես նավահանգստային ենթակառուցվածքների և Հյուսիսային ծովային երթուղու զարգացման պետական առաջադրանքների իրականացման մաս»։

Նավը բեռնված էր յուրաքանչյուրը 380 տոննա կշռող նավահանգստային կռունկներով, որոնք անհրաժեշտ էին Վլադիվոստոկի տերմինալի ընդլայնման համար, ինչպես նաև նոր սառցահատների համար նախատեսված սարքավորումներով։

Թարգմանությունը՝ Տաթև Ֆռանգյանի