Քաղաքականություն
24.12.2024 | 12:38
Վրաստանի նախագահ Սալոմե Զուրաբիշվիլին նախազգուշացրել է «ռեժիմի հնարավոր տապալման» մասին, եթե իշխող «Վրացական երազանք» կուսակցությանը չհաջողվի ընդդիմության հետ համաձայնության գալ նոր խորհրդարանական ընտրությունների անցկացման շուրջ։ Պետության ղեկավարի տեսաուղերձը հրապարակել է տեղական Interpressnews-ը։
Ըստ Զուրաբիշվիլիի՝ ճգնաժամը կանխելու օրինական ուղիները սպառվել են։ Նա ասել է, որ դատարաններն արդյունք չեն տվել, քանի որ իրավական համակարգը թերի է: Նախագահը նշել է նաև, որ Սահմանադրական դատարանը չի քննարկել «Վրացական երազանքի» հաղթանակի վերաբերյալ հայցը՝ ստեղծելով «հակասահմանադրական իրավիճակ»։
Զուրաբիշվիլին կարծում է, որ միակ ելքը նոր ընտրություններն են, որոնք պետք է անցկացվեն մինչև դեկտեմբերի 29-ը։ Նա դա անվանել է ժողովրդի, ընդդիմության և իր պահանջը։
«Ռեժիմը ինքնին փլուզվում է, դրան ոչ ոք չի մասնակցում։ Դա իշխանություն ունեցողների մեղքն է, քանի որ նրանք ժամանակին ուշքի չեն եկել»,- ասել է Վրաստաբւ նախագահը։
Սալոմե Զուրաբիշվիլին չի ճանաչել հոկտեմբերի 26-ին կայացած խորհրդարանական ընտրությունների արդյունքները։
Դեկտեմբերի 14-ին էլ Վրաստանում տեղի ունեցան նախագահական ընտրություններ։ Ընտրիչների կոլեգիան հաղթող ճանաչեց նախկին ֆուտբոլիստ Միխայիլ Ղավելաշվիլիին։
Գործող նախագահ Սալոմե Զուրաբիշվիլիի պաշտոնավարման ժամկետը լրանում է դեկտեմբերի 29-ին։ Երկրի վարչապետ Իրակլի Կոբախիձեն Զուրաբիշվիլիին սպառնացել է բանտարկությամբ, եթե պաշտոնավարման ժամկետի ավարտից հետո նա չհեռանա նախագահական նստավայրից։
Թարգմանությունը՝ Տաթև Ֆռանգյանի
