26.05.2026 | 10:40
«Վոլֆսբուրգն» առաջին անգամ դուրս է մնացել Բունդեսլիգայից․ ՏԵՍԱՆՅՈՒԹ
Սա պատասխան է Զելենսկիին․ Սլովակիայի վարչապետը՝ Մոսկվայում Պուտինի հետ հանդիպման մասին
Քաղաքականություն
23.12.2024 | 11:42
Սլովակիայի վարչապետ Ռոբերտ Ֆիցոն մեկնաբանել է Մոսկվայում ՌԴ նախագահ Վլադիմիր Պուտինի հետ հանդիպումը՝ այն որակելով որպես արձագանք ռուսական գազի տարանցման մասին Ուկրաինայի նախագահ Վլադիմիր Զելենսկիի խոսքերին: Նա ֆեյսբուքյան իր էջում գրել է, որ աշխատանքային հանդիպում է ունեցել Վլադիմիր Պուտինի հետ։
«ԵՄ բարձրագույն ներկայացուցիչներն իմ ուղևորության և դրա նպատակի մասին տեղեկացվել են ուրբաթ։ Իմ հանդիպումն արձագանք էր Ուկրաինայի նախագահ Վլադիմիր Զելենսկիին, որը հինգշաբթի պատասխանել է իմ անձնական հարցին, որ դեմ է Ուկրաինայի տարածքով մեր երկիր գազի ցանկացած տարանցմանը։ Ուկրաինայի նախագահը նաև կողմ է ռուսական միջուկային ծրագրի դեմ պատժամիջոցներին։ Նման վերաբերմունքը ֆինանսապես վնասում է Սլովակիային և վտանգում էլեկտրաէներգիայի արտադրությանը Սլովակիայի ատոմակայաններում, ինչն անընդունելի է»,- հայտարարել է Սլովակիայի վարչապետը։
Նա նշել է, որ Պուտինը հաստատել է Ռուսաստանի պատրաստակամությունը՝ շարունակելու գազ մատակարարել Արևմուտք և Սլովակիա, ինչը գործնականում անհնար է 2025 թվականի հունվարի 1-ից հետո՝ հաշվի առնելով «Ուկրաինայի նախագահի վերաբերմունքը»։
Ֆիցոն նաև հայտնել է, որ Պուտինի հետ մտքեր են փոխանակել Ուկրաինայում ռազմական իրավիճակի, պատերազմի շուտափույթ խաղաղ ավարտի հնարավորության և Սլովակիայի և Ռուսաստանի փոխհարաբերությունների վերաբերյալ։ Ըստ Սլովակիայի վարչապետի՝ Երկրորդ համաշխարհային պատերազմի ավարտի 80-ամյակի հետ կապված միջոցառումները նույնպես կօգնեն դրան։
Թարգմանությունը՝ Էմմա Չոբանյանի
