Վրաստանի իշխանությունները խոստացել են փոփոխություններ անել օտարերկրյա գործակալների մասին օրենքում․ Եվրոպայի խորհրդի գլխավոր քարտուղար

Վրաստանի կառավարությունը խոստացել է փոխել «Օտարերկրյա ազդեցության մասին» օրենքի բովանդակությունը (որը հայտնի է, որպես օտարերկրյա գործակալների մասին օրենք)։ Այս մասին մամուլի ասուլիսի ժամանակ հայտարարել է Եվրոպայի խորհրդի գլխավոր քարտուղար Ալեն Բերսեն, հայտնում է վրացական Առաջին ալիքը։

Բերսեի խոսքով՝ այդ նպատակով կստեղծվի աշխատանքային խումբ Վրաստանի և Եվրախորհրդի, այդ թվում՝ Վենետիկի հանձնաժողովի ներկայացուցիչների մասնակցությամբ։

«Ես մտահոգություն եմ հայտնել քաղաքացիական հասարակության կազմակերպությունների և անհատների իրավունքները ոտնահարող օրենսդրության վերաբերյալ: Այդ օրենսդրությունը պետք է փոփոխվի, որ լիովին համապատասխանի եվրոպական չափանիշներին, ինչպես նախատեսված է «Մարդու իրավունքների եվրոպական կոնվենցիա»-ով և ինչպես նշված է Վենետիկի հանձնաժողովի կողմից: Ես ողջունում եմ ու հայտնում, որ  կառավարությունը  խոստում է տվել փոխելու «Օտարերկրյա ազդեցության մասին» օրենքի բովանդակությունը։ Աշխատանքային խումբ է ստեղծվելու Վրաստանի և Եվրախորհրդի, այդ թվում՝ Վենետիկի հանձնաժողովի ներկայացուցիչների մասնակցությամբ, որը կբացահայտի օրենսդրության մեջ անհրաժեշտ փոփոխությունները»,-ասել է ԵԽ գլխավոր քարտուղարը՝ հույս հայտնելով, որ նմանատիպ գործընթացներ կարող են իրականացվել նաև այլ ոլորտներում, ինչպիսիք են իրավահավասարությունը, խտրականության կանխումը, ընտրական բարեփոխումները, բանտային և պրոբացիոն համակարգերի բարեփոխումները։

Այսօր Վրաստանի վարչապետ Իրակլի Կոբախիձեն իր հերթին հայտարարել էր, որ իշխանությունները պատրաստ են համագործակցել Եվրոպայի խորհրդի հետ և քննարկել օտարերկրյա գործակալների մասին օրենքը։
«Մենք քննարկել ենք թափանցիկության օրենքը և հայտարարել ենք, որ բաց ենք քննարկման համար… Մենք ասում ենք մի պարզ բան՝ եթե որևէ մեկը ապացույցներ բերի, որ այս օրենքում ինչ-որ բացասական բան կա, ապա մենք պատրաստ ենք քննարկել այդ հարցը, այդ թվում՝ համագործակցել Եվրոպայի խորհրդի կառույցների հետ»,- ճեպազրույցում ասել էր վարչապետը։