16.05.2026 | 16:04
Պարեկները հանրապետության տարբեր հատվածներում ատրճանակներ են հայտնաբերել
Սուդանը հրաժարվել է իր տարածքում ՌԴ ռազմածովային բազա տեղակայել․ МТ
Քաղաքականություն
19.12.2024 | 13:33
Ռուսաստանը շարունակում է Սուդանում Կարմիր ծովի ափին ռազմածովային բազա ստեղծելու փորձերը, սակայն դեռ չի հաջողվում հասնել այդ նպատակին։ Այս մասին չորեքշաբթի՝ դեկտեմբերի 18-ին, գրել է Moscow Times-ը։ Պարբերականը, վկայակոչելով Սուդանի հետախուզության աշխատակցին, հայտնում է, որ ռազմածովային բազայի կառուցման շուրջ համաձայնության գալու համար Ռուսաստանի Դաշնությունը տեղի իշխանություններին առաջարկել է ժամանակակից C-400 զենիթահրթիռային համակարգ (SAM) ,սակայն առաջարկը մերժվել է Սուդանի կողմից՝ վախենալով ԱՄՆ-ի և այլ արևմտյան երկրների բացասական արձագանքից։ Սուդանի հետախուզության աշխատակցի խոսքերը հաստատել են նաև ամերիկացի երկու պաշտոնյաներ, պարզաբանում է MT-ն։
Նոր ռազմածովային բազայի ձեռքբերումը Ռուսաստանի համար հատկապես կարևոր է դառնում Սիրիայում տեղի ունեցող վերջին իրադարձությունների լույսի ներքո, որտեղ նա կարող է կորցնել իր հենակետերը Բաշար ալ-Ասադի ռեժիմի տապալման պատճառով:
Չնայած դրան՝ ըստ MT-ի, երկրների միջև համաձայնություն է ձեռք բերվել ռուսական զենք և նավթամթերք գնելու վերաբերյալ։ Մասնավորապես, յոթամսյա դադարից հետո վառելիքի մատակարարումները վերսկսվել են. ապրիլից հոկտեմբեր Ռուսաստանը Սուդան է արտահանել 2,8 մլն բարել դիզելային վառելիք և բենզին, որը կազմել է Սուդանի ներմուծման գրեթե կեսը։
Պորտ Սուդանում ռուսական ռազմածովային բազայի կառուցման հարցը քննարկվել է դեռ 2019 թվականին, և երկրները կնքել են համապատասխան համաձայնագիր։ Սակայն երկրում քաղաքացիական պատերազմի բռնկումից հետո այն այդպես էլ չի վավերացվել։
Թարգմանությունը՝ Տաթև Ֆռանգյանի
