Արագածոտնի մարզպետի խորհրդականին թմրանյութ պահելու մեղադրանք է ներկայացվել

Արագածոտնի մարզպետի խորհրդականի մասնակցությամբ դեպքով վարույթ է նախաձեռնվել Քրեական օրենսգրքի 396-րդ հոդվածի 1-ին և 393-րդ հոդվածի 1-ին մասի հատկանիշներով, այսինքն՝ «առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը» և «իրացնելու նպատակով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը, առաքելը, տարածելը, գովազդելը կամ դրանք ապօրինի իրացնելը կամ մեկ ուրիշի դրդմամբ՝ նրա համար թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի ձեռք բերելը»։

Քննչական կոմիտեի մամուլի խոսնակ Կիմա Ավդալյանը Factor.am-ի հարցին ի պատասխան ասաց, որ վարույթի շրջանակներում մեկ անձ ձերբակալված է՝ անուն չնշելով։

Factor.am-ի տեղեկություններով, սակայն, խոսքը մարզպետի խորհրդական Արմեն Մարկոսյանի մասին է։ Քննչական կոմիտեում մեր աղբուրների փոխանցմամբ՝ ձերբալաված խորհրդականին արդեն մեղադրանք է ներկայացվել թմրամիջոց պահելու՝ այսինքն՝ Քրեական օրենսգրքի 396-րդ հոդվածի 1-ին մասի հատկանիշներով։

Հիշեցնենք, որ դեկտեմբերի 16-ին ՆԳՆ Ոստիկանության Աշտարակի բաժին է բերման ենթարկվել Արմեն Մարկոսյանը, որի մեքենայում, ըստ իրավապահների, թմրանյութ է հայտնաբերվել։ Թե իրեն վերագրվող արարքի վերաբերյալ ինչ դիրքորոշում ունի Մարկոսյանը, մեզ հայտնի չէ։

Արաքս Մամուլյան