30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Թուրքիայի կառավարությունը ֆինանսական պատժամիջոցներ է կիրառել ընդդիմության կողմից վերահսկվող 6 քաղաքապետարանների նկատմամբ
Քաղաքականություն
18.12.2024 | 10:29
Թուրքիայի Աշխատանքի նախարարությունը ֆինանսական պատժամիջոցներ է կիրառել վեց մունիցիպալիտետների նկատմամբ, որոնք ղեկավարվում են գլխավոր ընդդիմադիր Ժողովրդահանրապետական կուսակցության (CHP) կողմից՝ նպատակ ունենալով հավաքագրել կառավարության պարտքերը, գրում է Stockholm Center for Freedom-ը։
Նախարարությունը ձգտում է հավաքել վեց քաղաքների, այդ թվում՝ Ստամբուլի, Անկարայի, Ադանայի և Մերսինի քաղաքապետարանների պարտքը, ինչպես նաև Ստամբուլի Շիշլիի շրջանինը Սոցիալական ապահովության հաստատությանը (SGK) իրենց չվճարված հավելավճարների համար: Ֆինանսական պատժամիջոցների պատճառով արգելափակվել են նաև վեց քաղաքապետարանների բանկային հաշիվները։ Տուժել են նաև իրենց դուստր ընկերությունների բանկային հաշիվները:
Անկարայի քաղաքապետարանն ունի ամենաբարձր չմարված պարտքը կառավարությանը, այն կազմում է 5,7 միլիարդ լիրա (163 միլիոն դոլար): Նրան հաջորդում է Իզմիրի քաղաքապետարանը՝ 5,3 մլրդ լիրա, ապա Ստամբուլի քաղաքապետարանը՝ 3,3 մլրդ լիրա։
Միաժամանակ, CHP-ն և Ստամբուլի քաղաքապետարանը հերքել են քաղաքապետարանների նկատմամբ ֆինանսական պատժամիջոցների կիրառման մասին լուրերը։ Ստամբուլի քաղաքապետարանը X-ում հրապարակված հաղորդագրությամբ նշել է, որ ի գիտություն ԶԼՄ-ների հաղորդագրությունների՝ իր բանկային կամ մասնաճյուղերի հաշիվների վրա արգելափակում չկա։ Կուսակցության փոխնախագահը զգուշավոր է խոսել՝ հերքելով քաղաքապետարանների մասին մամուլի հրապարակումները։
«Մեր քաղաքապետարաններից որևէ մեկի դեմ ոչ մի գործողություն չկա։ Եթե որոշ լրագրողներ ինչ-որ բան են գրում, ներսից տեղեկություն են ստանում։ Մենք խոսել ենք տվյալ քաղաքապետերի և ադմինիստրատորների հետ, և նման իրավիճակ չկա, բայց դա չի նշանակում, որ դա տեղի չի ունենա»,- ասել է Գյոքհան Գյունայդինը։
Այս միջոցները գալիս են նախագահ Ռեջեփ Թայիփ Էրդողանի վերջին զանգից անմիջապես հետո, որը հրահանգել է աշխատանքի նախարար Վեդաթ Իշըքհանին «թափահարել» ընդդիմադիր համայնքապետարաններին իրենց պարտքերի պատճառով։
Էրդողանն ընդդիմության կողմից ղեկավարվող քաղաքապետարանների վրա ֆինանսական և դատական ճնշում գործադրելու՝ իր կառավարության ակնհայտ մտադրությունը ցուցադրել էր, երբ հուլիսին հայտարարել էր, որ Ֆինանսների նախարարությունն աշխատում է քաղաքապետարանների պարտքերը հավաքագրելու ծրագրի վրա։
CHP-ն երկրի ղեկավարին մեղադրել է ընդդիմադիր քաղաքապետարանների դեմ «ֆինանսական հեղաշրջում» իրականացնելու փորձի մեջ։ Ընդդիմադիր կուսակցությունը պնդում է, որ Էրդողանը փորձում է ֆինանսապես կաթվածահար անել ընդդիմադիր քաղաքապետարանները՝ խաթարելու ծառայություններ մատուցելու նրանց կարողությունը, որպեսզի վրեժ լուծի մարտին իր ղեկավարած «Արդարություն և զարգացում» կուսակցության (ԱԶԿ) ընտրություններում պարտության համար։
Մարտի 31-ի տեղական ընտրություններում CHP-ն 47 տարվա մեջ առաջին անգամ հաղթել էր՝ ապահովելով ձայների 37,7 տոկոսը, պահպանելով վերահսկողությունը հիմնական քաղաքներում և ապահովելով զգալի ձեռքբերումներ այլ շրջաններում, իսկ ԱԶԿ-ն երկրորդ տեղում էր՝ հավաքելով ընդամենը 35,4 տոկոս:
Անցյալ ամիս դատախազները նաև հետաքննություն են սկսել երեք քաղաքապետարանների նկատմամբ, որոնք ղեկավարվում են CHP-ի քաղաքապետերի կողմից՝ անկանոն ծախսերի և կառավարությանը չվճարված պարտքերի մեղադրանքով:
Ստամբուլի քաղաքապետ Էքրեմ Իմամօղլուն, որը համարվում է Էրդողանի ամենահզոր քաղաքական մրցակիցը, CHP-ի քաղաքապետարանների հետաքննությունն անվանել է «պարզապես դատական ոտնձգություն», որը սկսվել է կառավարության պատվերով։ Նա նաև քննադատել է դատական իշխանություններին այն բանի համար, որ տարիներ շարունակ ԱԶԿ-ի ղեկավարած քաղաքապետարաններում հետաքննություն չի իրականացվել և մեղադրել կառավարությանն ընդդիմության կողմից վերահսկվող քաղաքապետարանների դեմ «հեղինակության սպանություն» իրականացնելու մեջ:
Թարգմանությունը՝ Էմմա Չոբանյանի
