Հայաստանը և Իսպանիան քննարկել են անձնական տվյալների պաշտպանության ոլորտում համագործակցության զարգացման հեռանկարները

Սույն թվականի դեկտեմբերի 17-ին Անձնական տվյալների պաշտպանության գործակալության պետ Գրիգոր Ներսիսյանն ընդունել է Իսպանիայի Թագավորության դեսպանության գործերի ժամանակավոր հավատարմատար Քրիստինա Կոնեսա Սանչոյին:

Գործակալության պետը կարևորել է անձնական տվյալների պաշտպանության ոլորտում Հայաստան–Իսպանիա համագործակցության ձևավորման անհրաժեշտությունը՝ հաշվի առնելով անձնական տվյալների պաշտպանության իրավունքի կայացման և զարգացման գործում Իսպանիայի ունեցած մեծ ձեռքբերումները: Գործակալության պետն այս առումով բարձր է գնահատել անձնական տվյալների պաշտպանության ոլորտում Իսպանիայի լիազոր մարմնի (AEPD) հարուստ փորձը, որն ավելի քան 30 տարվա պատմություն ունի։

Քրիստինա Կոնեսա Սանչոն իր հերթին պատրաստակամություն է հայտնել նպաստելու երկու երկրների լիազոր մարմինների միջև համագործակցության ձևավորմանը՝ առաջարկելով գիտելիքների և փորձի փոխանակման նպատակով երկկողմ այցերի կազմակերպում ու համատեղ ծրագրերի իրականացում:

Գործակալության պետը ներկայացրել է նաև կառույցի կատարած աշխատանքներն ու առաջիկա անելիքները՝ հույս հայտնելով նոր ծրագրերի իրականացման գործընթացում տեսնել նաև իսպանական կողմի ներգրավվածությունը։

Կողմերը վստահություն են հայտնել, որ հանդիպումը լավ մեկնարկ կլինի ապագա համատեղ նախագծերի և նախաձեռնությունների համար: