Ադրբեջանի բանակում Թուրքիայի ԶՈՒ մոդելի ներդրման արդյունքներն են քննարկվել

Ադրբեջանի պաշտպանության նախարարի առաջին տեղակալ, բանակի գլխավոր շտաբի պետ, գեներալ-գնդապետ Քերիմ Վելիևը Բաքվում ընդունել է Թուրքիայի զինված ուժերի ցամաքային զորքերի հրամանատարության պատվիրակությանը՝ գեներալ-լեյտենանտ Թունջայ Ալթուղի գլխավորությամբ։ Նշելով, որ Ադրբեջանի և Թուրքիայի միջև առկա հաջող ռազմական համագործակցությունը հիմնված է բարեկամական և եղբայրական հարաբերությունների վրա, Վելիևը խոսել է այդ դաշնակցային հարաբերությունների ներդրման մասին երկու երկրների բանակաշինության գործում և ընդգծել դրանց հետագա զարգացման կարևորությունը։

Ալթուղը նշել է երկկողմ ռազմական համագործակցության բարձր մակարդակը՝ ուղղված երկու երկրների միջև փորձի փոխանակման ընդլայնմանը, և նշել է համատեղ զորավարժությունների կարևորությունը, ինչը ցույց է տալիս, որ Ադրբեջանը Թուրքիայի կարևոր գործընկերն է։ Հանդիպմանը նաև մտքերի հանգամանալից փոխանակում է կատարվել տարածաշրջանային անվտանգության հարցերի, ռազմական համագործակցության զարգացման հեռանկարների և փոխադարձ հետաքրքրություն ներկայացնող այլ հարցերի շուրջ։

Հաղորդվում է, որ Թուրքիայի պատվիրակությունը հանդիպել է պաշտպանության նախարարի խորհրդական, գեներալ-գնդապետ Բահթիյար Էրսայի հետ, որը Թուրքիայի ԶՈւ գեներալ է։ Հանդիպմանը մտքերի լայն փոխանակություն է ծավալվել ադրբեջանական բանակում Թուրքիայի զինված ուժերի մոդելի կիրառման աշխատանքների դրական արդյունքների և այլ հարցերի շուրջ։

Թուրքական պատվիրակությունն այցելել է նաև կենտրոնական հրամանատարական կետ և ծանոթացել այնտեղ ստեղծված պայմաններին։

Թարգմանությունը՝ Էմմա Չոբանյանի