Բայրամովը Վատիկանի ներկայացուցչի հետ հանդիպմանը դժգոհել է Հայաստանից

Ադրբեջանի ԱԳ նախարար Ջեյհուն Բայրամովը Բաքվում գտնվող Պետությունների և միջազգային կազմակերպությունների հետ հարաբերությունների Սուրբ Աթոռի քարտուղար արքեպիսկոպոս Փոլ Ռիչարդ Գալագերի հետ հանդիպմանը քննարկել է Ադրբեջանի և Վատիկանի միջև երկկողմ համագործակցության զարգացման հեռանկարները։ Ընդգծվել է, որ Հեյդար Ալիևի Հիմնադրամի ակտիվ մասնակցությունը՝ առաջին փոխնախագահ Մեհրիբան Ալիևայի գլխավորությամբ, աշխարհի շատ շրջաններում, այդ թվում՝ Վատիկանում միջազգային նշանակության մշակութային հուշարձանների վերականգնմանը, արժանի է բարձր գնահատանքի։

Բայրամովը հերթական անգամ ադրբեջանական քարոզչական թեզերով ներկայացրել է  Հայաստանի հետ հարաբերությունների կարգավորման գործընթացը։ Մանրամասն «քննարկվել են հետհակամարտային շրջանում տարածաշրջանում առկա իրավիճակը, Ադրբեջանի և Հայաստանի միջև հարաբերությունների կարգավորման գործընթացը, սահմանազատման հանձնաժողովների աշխատանքը»։

«Բայրամովն ընդգծել է, որ չնայած պաշտոնական Բաքվի նախաձեռնած խաղաղության օրակարգի առաջխաղացման կարևոր առաջընթացին՝ Հայաստանի Սահմանադրությամբ և այլ օրենսդրական ակտերով Ադրբեջանի դեմ պահպանվող տարածքային պահանջները, ինչպես նաև այդ երկրի արագ սպառազինումը սպառնալիք են տարածաշրջանային խաղաղության անվտանգության համար»,- ասվում է ադրբեջանական կողմի հաղորդագրությունում։

Այսօր ավելի վաղ Վատիկանի ներկայացուցչին ընդունել է նաև Ադրբեջանի նախագահ Իլհամ Ալիևը։ Հանդիպմանն Ալիևը նշել է, որ Բաքուն շարունակելու է ջանքերը՝ ուղղված Հարավային Կովկասի տարածաշրջանում խաղաղության և կայունության ապահովմանը։

Անդրադարձ է եղել Մերձավոր Արևելքում տիրող իրավիճակին։ Իլհամ Ալիևը ևս մեկ անգամ նշել է, որ «Ասադի վարչակարգի տապալումից հետո, եղբայրական Թուրքիայի հետ խորհրդակցելով, Բաքուն պատրաստ է աջակցել սիրիացի ժողովրդին հումանիտար խնդիրների լուծմանը»։

Հավելենք, որ Ադրբեջան այցի ընթացքում արքեպիսկոպոս Գալագերը մասնակցել է նոր կաթոլիկ եկեղեցու համար հողի օծմանը, որը կկառուցվի ի պատիվ Հովհաննես Պողոս երկրորդ պապի։

Թարգմանությունը՝ Էմմա Չոբանյանի