Ադրբեջանում ծայրահեղական խմբավորում է հայտնաբերվել, որը դիվերսիաներ է ծրագրել պետական կառույցների դեմ

Ադրբեջանում դիվերսիաներ ու մարդկանց պատանդ վերցնելու գործողություններ ծրագրած ծայրահեղական խմբավորում է հայտնաբերվել։ Այս մասին հայտնում  է Ադրբեջանի պետական ​​անվտանգության ծառայությունը։

Հաղորդվում է, որ Պետական ​​անվտանգության ծառայության կողմից ձեռնարկված օպերատիվ-հետախուզական համալիր միջոցառումներով ապացուցվել է, որ Ադրբեջանի քաղաքացիներ Ֆահրեդդին Շահմուրովը (ծնված 1984թ.), Ջալալ Մուրադովը (ծնված 1960 թ.), Քյամրան Բաբաևը (ծնված 1998թ.) և այլք ստեղծել են հանցավոր համայնք՝ Ադրբեջանի սահմանադրական համակարգի հիմքերի դեմ ծանր և առանձնապես ծանր հանցագործություններ կատարելու նպատակով, ինչպես նաև կազմակերպել են Ադրբեջանի տարածքում գաղտնի հանդիպումներ ու տարբեր փակ խմբեր սոցցանցերում՝ պատրաստվելով պետական կառույցների դեմ դիվերսիաներ իրականացնել։

Նշվում է, որ օտարերկրացու մասնակցությամբ գաղտնի հանդիպման ժամանակ հայտարարվել է, որ հանցավոր համայնքի դրոշը պատրաստվել և ներկայացվել է Շահմուրովին՝ ղեկավարելու հանցագործությունների ծրագրերի մշակումը, որոնք կատարվելու են հանուն համայնքի նպատակների։

Բաքուն հայտնում է, որ Շահմուրովը հանցավոր խմբի մյուս անդամների հետ նախապատրաստել է Ադրբեջանի Հանրապետության պետական ​​սահմանին գտնվող մաքսակետը գրավելու սադրիչ ծրագիր՝ նպատակ ունենալով վնասել երկրի պաշտպանունակությունն ու տնտեսական անվտանգությունը, պատանդ վերցնելով աշխատակիցներին և այնտեղ ծառայող այլ անձանց՝ հանցավոր համայնքի պահանջներն առաջ քաշելու նպատակով, սակայն ձեռնարկված միջոցառումների շնորհիվ կասեցվել է կազմակերպված խմբի անօրինական գործունեությունը։

Շահմուրովը կալանավորվել է Ադրբեջանի քրեական օրենսգրքի 28.282.2 (կազմակերպված խմբի կողմից դիվերսիոն գործողությունների նախապատրաստում), 28.215.3 (պատանդ վերցնելու նախապատրաստում), 218.1 (հանցավոր համայնքի ստեղծում հոդվածներով ) և 281.2 (հակպետական ​​կոչեր պարունակող նյութերի տարածում) հոդվածներով, իսկ Ջալալ Մուրադովը և Քյամրան Բաբաևը՝ 281.2-րդ և այլ հոդվածներով։

Հետաքննությունը շարունակվում է։

Թարգմանությունը՝ Էմմա Չոբանյանի