ՀԴԿ-ն կոչ է անում իր կուսակից ընկերներին և կողմնակիցներին ձայն տալ քաղաքապետի թեկնածուներ Գևորգ Հովսեփյանին, Մանուել Գասպարյանին և Անահիտ Թարխանյանին

Հայաստանի Դեմոկրատական Կուսակցության նախագահության որոշումը 2018թ. սեպտեմբերի 23-ին Երևանի ավագանու ընտրություններում կուսակցության դիրքորոշման վերաբերյալ

Գնահատելով ժողովրդական շարժման ձեռք բերած հաջողությունները, նախկին արատավոր համակարգի փոխարինման փորձերը, կոռուպցիայի և կաշառակերության դեմ սկսված պայքարը, ընտրություններում բաց և թափանցիկ մրցակցային մթնոլորտ ձևավորելու, ընտրակաշառքի և ադմինիստրատիվ ռեսուրսի օգտագործումը բացառելու ցանկությունը, միաժամանակ փաստում ենք՝

• Երևանի ավագանու ընտրություններում մասնակից ուժերի կողմից այդպես էլ չներկայացվեց մայրաքաղաքի՝ որպես առանձնահատուկ միավորի զարգացման ամբողջական ծրագիր:
• Մայրաքաղաքի ընտրողների համար այդպես էլ անհայտ մնաց, թե ինչպիսի ծրագրեր ունեն ավագանու թեկնածուները Երևանը որպես Հայաստանի Հանրապետության զարգացումը կողմնորոշող ագլոմերացիա և ինչպիսի հիմնարար առաջարկություններով են նրանք հանդես գալու ՀՀ կառավարության առջև երկրում ժամանակակից գիտա-տեխնիկական ներուժը և մարդկային ռեսուրսը օգտագործելու առումով:
• Դրա հետ մեկտեղ, մեր մտահոգությունն ենք հայտնում քարոզարշավի ընթացքում ձևավորված անհանդուրժողականության և սիրո բացակայության մթնոլորտից: Օրինակները հասու են բոլորին, շարադրելու կարիք չկա:

Ելնելով վերոգրյալից և հաշվի առնելով ընտրություններին մասնակից մի շարք ուժերի հետ ունեցած գաղափարական տարաձայնությունները, նաև գիտակցելով, որ սոցիալական արդարության սկզբունքը և ազգային արժեհամակարգ պաշտպանող քաղաքական ուժերը հզորանալու և որոշիչ մրցակցություն ապահովելու համար պետք է միավորվեն և կուռ դաշինք ձևավորեն, ՀԴԿ-ն կոչ է անում իր կուսակից ընկերներին և կողմնակիցներին սեպտեմբերի 23-ին ձայն տալ այն քաղաքական ուժերի թեկնածուներին, որոնք գաղափարապես և իրենց դավանած արժեհամակարգով մոտ են մեր ծրագրերին: Դրանց թվում են ՝ <<Հայք>> կուսակցությունը (Գևորգ Հովսեփյան), <<Ժողովրդավարական ուղի>> կուսակցությունը (Մանուել Գասպարյան), <<Երևանի հանրություն>> դաշինքը (Անահիտ Թարխանյան):

ՀԴԿ լրատվական ծառայությունպ