16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
«Իմ մարդ» չունեմ․ Արսեն Թորոսյանն՝ արյունաբանական կենտրոնի տնօրենի պաշտոնում Ստեփան Դանիելյանի նշանակման մասին
Քաղաքականություն
21.09.2018 | 11:36
Առողջապահության նախարար Արսեն Թորոսյանը չի կիսում տեսակետը, որ Ռուբեն Յոլյանի անվան արյունաբանական կենտրոնի տնօրենի պաշտոնի համար քննություն տված և չանցած Սամվել Դանիելյանն իր մարդն է։
««Իմ մարդ» չունեմ և կադրերին ընտրում եմ միայն մասնագիտական հատկանիշներով»,- ի պատասխան Factor.am-ի հարցին՝ նախարարի պատասխանը փոխանցել է նրա մամուլի խոսնակ Լիաննա Եղիազարյանը։
Նախարար Թորոսյանը նաև նշել է, որ Ռ. Յոլյանի անվան արյունաբանական կենտրոնի տնօրենի պաշտոնի համար կհայտարարվի նոր մրցույթ, քանի որ կայացած մրցույթում հաղթող թեկնածու չի եղել:
«Առաջիկա օրերին կհայտարարվի նոր մրցույթ, որին կարող են մասնակցել մրցույթի պահանջներին համապատասխանող անձինք: Առողջապահության նախարարության ենթակա բուժհիմնարկների ղեկավարների մրցույթների ազատ, արդար և օբյեկտիվ անցկացումը իմ հստակ դիրքորոշումն է` անկախ մամուլում տեղ գտնող որոշ անառողջ ու անհիմն մեկնաբանություններից»,- ասված է մեզ տրված պատասխանում։
Հիշեցնենք, որ «Ժողովուրդ» թերթը գրել էր, որ Ռուբեն Յոլյանի անվան արյունաբանական կենտրոնի տնօրենի պաշտոնի շուրջ առողջապահության նախարար Արսեն Թորոսյանի որոշումների արդյունքում լարված կրքերը դեռ չեն հանդարտվում: Նախօրեին պարզ դարձավ, որ արյունաբանական կենտրոնի տնօրենի պաշտոնի համար նոր մրցույթ է հայտարարվելու: Իսկ ահա սեպտեմբերի 19-ի կայացած մրցույթում հաղթող թեկնածու չի եղել:
