Լևոն Սարգսյանին դեռ հետախուզում են․ լիբանանյան խաղատուն այցելելու մասին լուրը կուսումնասիրվի

«Ժամանակ» թերթն այսօր գրել էր, որ սեպտեմբերի 18-ին Լիբանանի մայրաքաղաք Բեյրութից 20 կիլոմետր հեռավորության վրա գտնվող Ջհոնի քաղաքի Cazino de Liban հանրահայտ խաղատուն են այցելել նախկին նախագահ Սերժ Սարգսյանի երկու եղբայրները` Լևոն և Սաշիկ Սարգսյանները, իսկ նրանց ընկերակցել է լիբանանահայ, նախկին ռամկավար Հարություն Երկանյանը:

Factor.am-ը փորձեց Հատուկ քննչական ծառայությունից պարզել՝ ինչպե՞ս կարող էր քրեական գործով անցնող 3-րդ նախագահի եղբայրը հատել երկրի սահմանը և այս առնչությամբ ի՞նչ տեղեկություն ունի ՀՔԾ-ն։

Մեզ հետ զրույցում ՀՔԾ մամուլի խոսնակ Մարինա Օհանջանյանն ասաց, որ Հատուկ քննչական ծառայությունում է գտնվում միայն Լևոն Սարգսյանի նկատմամբ հարուցված քրեական գործը․

«Նրա նկատմամբ հարուցված է քրեական գործ՝ Քրեական օրենսգրքի 314․ 3-րդ՝ «Հայտարարագրերում կեղծ տվյալ ներկայացնելը», և 310․1-ին՝ «Ապօրինի հարստանալը» հոդվածներով։ Որպես խափանման միջոց ընտրվել է կալանավորումը։ Այս պահին Լևոն Սարգսյանի նկատմամբ հայտարարած է հետախուզում»։

Factor.am-ը փորձեց Ոստիկանությունից պարզել՝ արդյոք մամուլի հրապարակումը, որտեղ նշված է, որ հետախուզման մեջ գտնվող Լևոն Սարգսյանին տեսել են  Cazino de Liban խաղատանը դառնալու է ոստիկանության ուսումնասիրման նյութ։

Ոստիկանության լրատվական ծառայությունից հայտնեցին, որ Լևոն Սարգսյանի որոնողական աշխատանքները շարունակվում են. «Ոստիկանությունը օգտագործում է բոլոր միջոցները հետախուզվողին հայտնաբերելու ուղղությամբ, իսկ այն հրապարակումը, որն արվել է նրա գտնվելու վայրի վերաբերյալ, ոստիկանությունը կուսումնասիրի»։