Քաղաքականություն
08.12.2024 | 20:46
Իրանի Իսլամական Հանրապետության արտաքին գործերի նախարարությունը հայտարարել է, որ Սիրիայի ճակատագիրը պետք է որոշվի բացառապես այս երկրի ժողովրդի կողմից՝ առանց արտաքին միջամտության կամ ճնշման։ Այս դիրքորոշումը արտահայտվել է՝ հաշվի առնելով Սիրիայում տեղի ունեցող վերջին իրադարձությունները․ հայտարարել է Իրանի ԱԳՆ-ն։
«Իրանը կարևորում է ռազմական գործողությունների անհապաղ դադարեցումը, ահաբեկչական հարձակումների կանխարգելումը և ազգային երկխոսության նախաձեռնումը։ Այս երկխոսությունը պետք է ներառի սիրիական հասարակության բոլոր շերտերին՝ նպաստելով ներառական կառավարության ձևավորմանը, որը կարտացոլի ողջ սիրիացի ժողովրդի շահերը։
Հղում կատարելով ՄԱԿ-ի Անվտանգության խորհրդի 2254 բանաձևին՝ Իրանը վերահաստատում է իր աջակցությունը Սիրիայում քաղաքական գործընթացի առաջմղմանը և ընդգծում ՄԱԿ-ի հետ շարունակական համագործակցության կարևորությունը»,- նշված հաղորդագրությունում։
Նախարարությունը նշել է նաև, որ այս ժամանակահատվածում անհրաժեշտ է պաշտպանել Սիրիայի բոլոր քաղաքացիների անվտանգությունը, կրոնական սրբավայրերի սրբությունը, ինչպես նաև դիվանագիտական և հյուպատոսական հիմնարկները՝ միջազգային իրավունքի շրջանակներում։ Իրանի և Սիրիայի ժողովուրդների միջև բարեկամական հարաբերությունները երկար պատմություն ունեն, և ակնկալվում է, որ դրանք կշարունակեն զարգանալ՝ հիմնվելով ընդհանուր շահերի վրա։
Իրանը Սիրիան համարում է տարածաշրջանում առանցքային և ազդեցիկ երկիր և ընդգծում է, որ ջանք չի խնայի երկրում անվտանգության և կայունության վերականգնման համար։ Նա պատրաստ է շարունակել խորհրդակցությունները տարածաշրջանի և միջազգային գործընկերների հետ՝ նպաստելով Սիրիայի ապագայի կայուն զարգացմանը։
Նախարարությունը նաև շեշտել է, որ իր գործողություններն ու դիրքորոշումները կհամաձայնեցվեն Սիրիայում ու տարածաշրջանում զարգացումների և ազդեցիկ խաղացողների պահվածքի հետ։
