Քաղաքականություն
04.12.2024 | 23:18
ՆԱՏՕ-ի գլխավոր քարտուղարը կարծում է, որ Հյուսիսային Կորեան օգնություն է ստանում Ռուսաստանից միջուկային ծրագրի զարգացման հարցում։ Այս մասին Մարկ Ռյուտեն Բրյուսելում ասել է AFP-ին։
«Հիմա ես չեմ պատրաստվում հետախուզական տեղեկատվություն տրամադրել, բայց, ընդհանուր առմամբ, կարող եմ ասել, որ միամիտ լինել պետք չէ։ Եվ հիմա ես խոսում եմ այս մասին, քանի որ բոլոր հիմքերը կան ասելու, որ միջուկային և հրթիռային տեխնոլոգիաները մատակարարվում են Հյուսիսային Կորեա։ Սա վտանգ է ստեղծում, որ Հյուսիսային Կորեան սպառնալիք կդառնա ոչ միայն մեզ համար այստեղ, այլ նաև ԱՄՆ-ի և Կանադայի և, իհարկե, տարածաշրջանի, այդ թվում՝ Հարավային Կորեայի և Ճապոնիայի համար»,- ասել է նա, փոխանցում է BBC-ի ռուսական ծառայությունը։
Ռուսաստանը և Հյուսիսային Կորեան զգալիորեն ամրապնդել են իրենց ռազմական կապերը վերջին ամիսներին՝ հարցեր առաջացնելով այն մասին՝ արդյո՞ք Հյուսիսային Կորեայի ռեժիմը սկսել է հասանելիություն ունենալ ռուսական ռազմական տեխնոլոգիաներին։
Այս տարվա հունիսին Հյուսիսային Կորեան և Ռուսաստանը ստորագրել են համապարփակ ռազմավարական գործընկերության համաձայնագիր։ The New York Times-ն այդ ժամանակ գրել էր, որ պայմանագրի շրջանակում Մոսկվայի կողմից խոստացված տեխնոլոգիական օգնությունը նշված չէ համաձայնագրում, բայց եթե այն ներառի տեխնոլոգիաներ, որոնք Կիմ Չեն Ընը ձգտում է բարելավել, դա կօգնի ԿԺԴՀ-ին միջուկային մարտագլխիկ մշակել:
Թարգմանությունը՝ Տաթև Ֆռանգյանի
