22.06.2026 | 11:45
«Տելեկոմ Արմենիա»-ն և «AzerTelecom»-ը համաձայնագիր են ստորագրել ինտերնետ թրաֆիկի տարանցման վերաբերյալ
Վրաստանում ցույցերի ժամանակ ձերբակալվածներին մինչև 7 տարվա ազատազրկում է սպառնում. ՆԳՆ
Քաղաքականություն
02.12.2024 | 17:16
Վրաստանի ՆԳՆ-ի տվյալներով՝ Թբիլիսիում բողոքի ցույցերի ժամանակ ոստիկանների վրա հարձակվելու և գույք հրկիզելու մեղադրանքով ձերբակալվել են 17 և 21 տարեկան երիտասարդներ։ Նրանց սպառնում է մինչև 7 տարվա ազատազրկում, գրում է Գրուզիա օնլայնը։
Գերատեսչությունից հայտնում են, որ ընթացիկ գործողությունների շրջանակում «ագրեսիվ խմբերի կողմից կատարված բոլոր հանցավոր արարքները» քննվում են Քրեական օրենսգրքի 187-րդ և 353-րդ հոդվածներով։
«Քննությամբ պարզվել է, որ այս տարվա նոյեմբերի 29-ին Ռուսթավելի պողոտայում հանրահավաքի ժամանակ մեղադրյալ Գ.Մ. [ծնված 2003թ.] ՆԳՆ աշխատակցի վրա հրավառության տեխնիկա նետելով՝ նրան մարմնական տարբեր վնասվածքներ է պատճառել, [ՆԳՆ աշխատակցին] ցուցաբերվել է համապատասխան բուժօգնություն։ Նույն օրը Մ.Գ.-ն [ծնված 2007թ.] օրենսդիրի շենքի վրա է նետել հրկիզող առարկա, ինչի հետևանքով խորհրդարանի շենքի տարածքներից մեկում հրդեհ է բռնկվել։
Իրավապահ մարմինների աշխատակիցների կողմից իրականացված քննչական գործողությունների արդյունքում երկու մեղադրյալները բերման են ենթարկվել Թբիլիսիում։ Ընթացող նախաքննության շրջանակում ոստիկանության աշխատակիցների վրա հարձակում գործելու և ծառայության ընթացքում հրկիզելու միջոցով գույքին վնաս պատճառելու մեղադրանքով ձերբակալվել է երեք անձ։
Ներքին գործերի նախարարությունը շարունակում է հետաքննությունը՝ հանցագործություն կատարած բոլոր անձանց հայտնաբերելու և ձերբակալելու ուղղությամբ։
«Եվս մեկ անգամ նշում ենք, որ յուրաքանչյուր ապօրինի գործողության կհետևի իրավապահների կողմից համապատասխան իրավական արձագանքը»,- հայտարարել է ՆԳՆ-ն։
Թարգմանությունը՝ Տաթև Ֆռանգյանի
