Երբ Սերժ Սարգսյանն եկել էր ԱԺ ընտրվելու, Արտակ Զեյնալյանն իր հարցերով նրան տարբերակ չէր թողել. Էդմոն Մարուքյան. ՏԵՍԱՆՅՈՒԹ

Արտակ Զեյնալյանը փորձված մարդ է. նա այն պատգամավորն էր, որն իր հարցերով նեղն էր գցում նախարարներին, նա այն քիչ թվով պատգամավորներից էր, որ երբ Սերժ Սարգսյանը եկել էր խորհրդարան՝ ընտրվելու, Արտակ Զեյնալյանն իր հարցերով ու ելույթներով ուղղակի տարբերակ չթողեց Սերժ Սարգսյանին: Այս մասին այսօր՝ սեպտեմբերի 19-ին նախընտրական քարոզարշավի շրջանակում Մալաթիա-Սեբաստիա համայնքում հանդիպման ժամանակ հայտարարեց ՀՀ ԱԺ «Ելք» խմբակցության պատգամավոր Էդմոն Մարուքյանը:

Նա քաղաքացիներին կոչ արեց սեպտեմբերի 23-ին մի կողմ թողնել բոլոր կարևոր գործերը, գնալ ընտրատեղամաս և ընտրել «Լույս» դաշինքին, որի քաղաքապետի թեկնածուն է Արտակ Զեյնալյանը: Ասաց՝ իրենց առջև կանգնած են մարդիկ, որոնք փորձ ունեն, որոնք նվիրված են իրենց գործին:

Էդմոն Մարուքյանի խոսքով՝ Հայաստանում հիմա իրապես հետաքրքիր ժամանակաշրջան է, երբ յուրաքանչյուրը, որպես ՀՀ քաղաքացի, հնարավորություն ունի միանալ փոփոխություններին, ներդրում ունենալ այդ փոփոխություններում: «Մի կարևոր հանգամանք կա. այս օրերին բազմաթիվ տեղեկատվական աղբ է լցվել սոցցանցեր, մամուլ, տեղեկատվական դաշտը ողողված է տարբեր լուրերով՝ սուտ, ճիշտ, կիսաճիշտ, ապատեղեկատվություն… Բայց մի կարևոր հանգամանք կա. երբ դուք մտածում եք քաղաքական ուժերի մասին, ամենակարևոր հանգամանքը, կարծում եմ, անցած ճանապարհն է և փորձը, թե ով ինչ փորձ ունի, և մենք՝ որպես ՀՀ քաղաքացիներ, ում ինչում ենք փորձել»,- ասաց Մարուքյանը:

Նրա խոսքով՝ այս օրերին տարբեր բաներ է լսում «Լույս» դաշինքի՝ «Լուսավոր Հայաստան» և «Հանրապետություն» կուսակցությունների մասին. «Այնպիսի բաներ եմ լսում մեր մասին, որ ուղղակի ապշում եմ, մտածում եմ՝ կարո՞ղ է մենք 10-15 տարի իշխանության մեջ ենք եղել, կարո՞ղ է՝ մենք ենք արել, որ երկիրն այս վիճակում է հայտնվել: Ուղղակի աբսուրդ է: Եվ շատ կարևոր հանգամանք կա. այս երկու ուժերը՝ «Լույս» դաշինքը, երբևէ որտեղ ստանձնել է որևէ պատասխանատվություն, ամենաանբիծ ձևով այդ պատասխանատվությունն իրացրել են: Մեր ավագանու թիմի անդամներն իրենց ոլորտներում անբիծ կենսագրություն ունեն»:

Մանրամասները՝ տեսանյութում