17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Վարչապետը շնորհավորական ուղերձներ է հղել Արաբական Միացյալ Էմիրությունների նախագահին և փոխնախագահին
Քաղաքականություն
02.12.2024 | 17:02
Վարչապետ Նիկոլ Փաշինյանը շնորհավորական ուղերձներ է հղել Արաբական Միացյալ Էմիրությունների նախագահ շեյխ Մոհամմեդ բին Զայեդ Ալ Նահյանին և փոխնախագահ, վարչապետ, Դուբայի կառավարիչ շեյխ Մոհամմեդ բին Ռաշիդ Ալ Մաքթումին՝ Ազգային տոնի առթիվ:
ԱՄԷ նախագահին ուղղված ուղերձում նշված է.
«Ջերմորեն շնորհավորում եմ Ձեզ և անկեղծ բարեմաղթանքներս եմ հղում Արաբական Միացյալ Էմիրությունների Ազգային տոնի առթիվ։
Ուրախությամբ արձանագրում եմ, որ երկկողմ հարաբերություններն այսօր գտնվում են բարձր մակարդակում: Այդ մասին են վկայում տարեցտարի խորացող քաղաքական երկխոսությունը, փոխվստահության և փոխշահավետության վրա հիմնված բազմոլորտ համագործակցության ընդլայնումը:
Միևնույն ժամանակ վստահ եմ, որ երկուստեք ջանքերի շնորհիվ կարող ենք մեր փոխգործակցությունը բարձրացնել ռազմավարական մակարդակի, որի կապակցությամբ հայտնում եմ Հայաստանի Հանրապետության կառավարության պատրաստակամությունն այդ ուղղությամբ ձեռնարկելու անհրաժեշտ քայլեր՝ ի շահ մեր բարեկամ պետությունների և ժողովուրդների:
Առիթը պատեհ համարելով՝ մաղթում եմ Ձեզ քաջառողջություն և ամենայն հաջողություն, իսկ Արաբական Միացյալ Էմիրությունների բարեկամ ժողովրդին՝ հարատև խաղաղություն և բարգավաճում»։
ԱՄԷ փոխնախագահին ուղղված ուղերձում ասված է.
«Ի սրտե շնորհավորում եմ Ձեզ Արաբական Միացյալ Էմիրությունների Ազգային տոնի առթիվ:
Հայաստանը մեծապես կարևորում է բարեկամ Արաբական Միացյալ Էմիրությունների հետ հարաբերությունների շարունակական զարգացումը և փոխգործակցության խորացումը երկկողմ և բազմակողմ հարթակներում:
Վերահաստատում եմ Հայաստանի և Արաբական Միացյալ Էմիրությունների միջև համագործակցության մակարդակն էլ ավելի բարձրացնելու Հայաստանի Հանրապետության կառավարության հանձնառությունը և այդ նպատակին հասնելու համար բոլոր ջանքերը գործադրելու պատրաստակամությունը:
Կրկին շնորհավորելով Ազգային տոնի առթիվ՝ մաղթում եմ Ձեզ քաջառողջություն և հաջողություն, իսկ Արաբական Միացյալ Էմիրությունների բարեկամ ժողովրդին՝ հարատև խաղաղություն և բարեկեցություն»:
