Սիրիայում Թուրքիայի կողմից աջակցվող զինյալները գրոհում են Հալեպի ուղղությամբ. կառավարական հսկողության տակ գտնվող տարածքներ են գրավվել

Սիրիայի հյուսիսում ընդդիմության վերջին անկլավում գտնվող ապստամբները, որոնց աջակցում է Թուրքիան, լայնածավալ ռազմական գործողություններ են սկսել սիրիական բանակի դեմ և տարածքներ գրավել։ Ապստամբների հարձակումն ընդգրկում է Սիրիայի նախագահ Բաշար Ասադի վերահսկողության տակ գտնվող առնվազն 10 շրջան Հալեպ նահանգի հյուսիս-արևմուտքում։

Al Jazeera-ն գրում է, որ սիրիական բանակի տասնյակ զինվորներ և ապստամբ զինյալներ են սպանվել հյուսիսային Հալեպ նահանգում, որտեղ Հայեթ Թահրիր ալ-Շամ (HTS) զինված խմբավորումը և դաշնակից ուժերը գրավել են Սիրիայի նախագահ Բաշար Ասադի զինվորականների վերահսկողության տակ գտնվող առնվազն 10 շրջաններ:

Մարդու իրավունքների սիրիական դիտորդական կենտրոնը (SOHR) հայտնել է, որ գրեթե 100 մարտիկ և զինվոր է սպանվել բախումների ժամանակ՝ HTS-ի կողմից իրականացված գործողությունից հետո, որը վերահսկում է Սիրիայի հյուսիս-արևմուտքի մեծ տարածքը:

Նշվում է, որ սպանվել են HTS-ի 44 անդամներ, ինչպես նաև դաշնակից զինված խմբավորումների 16 անդամներ:

«Ավելին, սիրիական ռեժիմի ուժերի 37 անդամներ, այդ թվում՝ տարբեր աստիճան ունեցող առնվազն չորս սպա, գերեվարվել են, գրավվել են զենքի պահեստներ, զրահամեքենաներ, տեխնիկա և ծանր սպառազինություն»,- ասվում է հայտարարության մեջ։

Մոնիթորինգային խումբը նաև նշում է, որ խաղաղ բնակիչներ, այդ թվում՝ երեխաներ են զոհվել ու վիրավորվել բախումների հետևանքով, սիրիական բանակի ուժերը «հարյուրավոր արկեր և հրթիռներ են արձակել քաղաքացիական և ռազմական դիրքերի ուղղությամբ»:

Այս հարձակումն առաջին զգալի տարածքային առաջխաղացումն է 2020 թվականի մարտից ի վեր, երբ Ռուսաստանի և Թուրքիայի միջնորդությամբ հրադադարը ժամանակավորապես դադարեցրել էր լայնածավալ ռազմական գործողությունները Սիրիայի հյուսիս-արևմուտքում:

Թարգմանությունը՝ Էմմա Չոբանյանի