10.08.2026 | 16:09
Երբ պատգամավորն ասում է՝ ուզում եմ հայ զինվորը մեռնի, քննարկելի՞ է էթիկայի հանձնաժողովում․ Ռուբինյան. ՏԵՍԱՆՅՈՒԹ
Լուկաշենկոն սպառնացել է «ամբողջությամբ ինտերնետը անջատել» բողոքի ակցիաների դեպքում
Քաղաքականություն
22.11.2024 | 19:31
Բելառուսի նախագահ Ալեքսանդր Լուկաշենկոն հայտարարել է, որ եթե 2020 թվականի բողոքի ցույցերի նման ցույցեր տեղի ունենան 2025 թվականի հունվարին կայանալիք նախագահական ընտրությունների ժամանակ, նա «ամբողջովին կանջատի ինտերնետը»։ Չորս տարի առաջ տեղի ունեցած ընտրություններից ի վեր բելառուսցիները համացանց մուտք գործելու խնդիրներ ունեն, գրում է Կոմերսանտը:
Հումանիտար գիտությունների ոլորտում մասնագիտացած բուհերի ուսանողների հետ հանդիպմանը Ալեքսանդր Լուկաշենկոյին հարցրել են, թե ինչու է ինտերնետն անջատվում նախընտրական քարոզարշավի ժամանակ։ Ուսանողներից մեկը հիշեցրել է, որ 2020 թվականի նախագահական ընտրությունների ժամանակ ինտերնետի խափանումները երկրում տևել են չորս օր։
«Եթե դա կրկնվի, մենք այն ընդհանրապես կանջատենք»,- պատասխանել է Բելառուսի նախագահը։
«Անկեղծ կասեմ, որ դա գրեթե միշտ, հատկապես սկզբնական փուլում, եղել է իմ թույլտվությամբ։ Երբ ունես երկու խնդիր, սկսում ես կշռադատել, թե որն է ավելի կարևոր։ Կշեռքի նժարին երկիրն էր։ Եթե մենք չպահեինք երկիրը․․․ «փոփոխություններ, փոփոխություններ», «մենք սա ենք ուզում, նա ենք ուզում»։ Եվ ես հասկանում էի, որտեղից է դա գալիս։ Ինտերնետի միջոցով էր դա գալիս, առաջին հերթին Լեհաստանից, երթուղին, ուր կգնանք, ինչպես կգնանք»,- ասել է Լուկաշենկոն։
Հիշեցնենք՝ Բելառուսում 2020 թ նախագահական ընտրություններից հետո զանգվածային բողոքի ցույցեր էին սկսվել՝ Ալեքսանդր Լուկաշենկոյի հրաժարականի պահանջով։ Դրանք ուղեկցվեցին աննախադեպ բռնաճնշումներով։ Բելառուսական իրավապաշտպան կազմակերպությունների տվյալներով՝ նախագահական քարոզարշավի սկզբից մինչև 2020 թվականի վերջը բերման է ենթարկվել ընդհանուր առմամբ 35 հազար ցուցարար։ Նախագահի ընդդիմադիր թեկնածու Սվետլանա Տիխանովսկայայի դեմ մի քանի քրեական գործ կա հարուցված, նա լքել է Բելառուսը ընտրություններից անմիջապես հետո։
Թարգմանությունը՝ Տաթև Ֆռանգյանի
