16.02.2026 | 12:03
«Խաղաղության կամուրջ» նախաձեռնության հայաստանյան անդամների մամուլի ասուլիսը՝ ՈՒՂԻՂ
Սեպտեմբերի 23-ին Երևանում հեղափոխությունն ու հակահեղափոխությունը կավարտվեն․ Արմեն Բադալյան․ ՏԵՍԱՆՅՈՒԹ
Քաղաքականություն
18.09.2018 | 19:51
Քաղտեխնոլոգ Արմեն Բադալյանը չի հասկանում՝ ինչի՞ց է դժգոհում «Բարգավաճ Հայաստան» կուսակցության քաղաքապետի թեկնածու Նաիրա Զոհրաբյանը։ «Ես չեմ հասկանում ԲՀԿ-ի թեկնածուն ինչի՞ց է բողոքում, եթե իր դեմ տեղեկատվական տեռոր են անում, նույնն էլ ինքը պետք է անի։ Սա է ընտրական գործընթացի էությունը, մրցակցությունը տարբեր ձևերով է արտահայտվում»,- Factor.am -ի հետ զրույցում նշում է Արմեն Բադալյանը՝ հավելելով, որ քաղաքական բոլոր տեխնոլոգիաները, որոնք կարող են նպաստել թեկնածուների հաղթանակին, օգտագործելի են, իսկ «տեղեկատվական տեռորն էլ օրենքի խախտում չէ»։
Արմեն Բադալյանն, այնուամենայնիվ, նկատում է, որ ընտրական պայքարի քաղաքակիրթ ձևերից մեկն էլ թեկնածուների միջև բանավեճն է։ Հարցին՝ թե ինչո՞վ է պայմանավորված «Իմ քայլը» դաշինքի թեկնածուի՝ բացառապես բոլոր 11 մրցակիցների հետ բանավիճելու որոշումը և իր մրցակիցներից, օրինակ, Նաիրա Զոհրաբյանի հրավերը մերժելը, քաղտեխնոլոգը նշում է․ «Դա խուսափել է նշանակում։ Ասում է, թե 11 թեկնածուի հետ կգնամ բանավեճի, որովհետև իրեն ավելի հեշտ է թաքնվել մյուս գործիչների թիկունքում, իսկ, եթե ինքը դուրս գա բանավեճի երկուսի հետ, ապա իր չկայացվածությունը միանգամից ակնառու կլինի»։
Արմեն Բադալյանի համոզմամբ՝ այս փաստն այնքան ակնառու է, որ վարչապետ Նիկոլ Փաշինյանն «Իմ քայլը» դաշինքի հանրահավաքներին մասնակցելով փորձում է ստվերել այդ բացը։
«Իմ քայլը» դաշինքի թեկնածուն քաղաքական գործիչ չէ, նա չի կարող քաղաքական կերպարով ներկայանալ, դրա համար էլ վարչապետը գնում է հանրահավաքներին և փորձում է այդ բացը լրացնել զգացմունքային պահերով։ Վարչապետն իր հեղինակությամբ և զգացմունքային ելույթներով փորձում է ծածկել իր թեկնածուի զգալի բացը»,- կարծում է քաղտեխնոլոգը։
Վերջինս նաև նկատում է, որ հասարակության այն հատվածը, որն արդեն դուրս է եկել էյֆորիկ վիճակից, կարող է համախմբվել ավագանու ընտրություններին մասնակցող այլ ուժի շուրջ։ «Բերեմ դրա համար մի քանի պատճառ․ Տարոն Մարգարյանին մի քանի լրատվամիջոցներով ասացին, որ ունի հսկայական ունեցվածք, սակայն 2․5 ամսվա ընթացքում մենք չտեսանք, որ իրավապահ մարմինները մի հարցի վերաբերյալ կանչեն նրան հարցաքննության, այստեղ առաջանում են կասկածներ՝ արդյո՞ք տեղի չի ունեցել անդրկուլիսյան գործարք։ Հաջորդը՝ ասում են 2-րդ նախագահը 4 մլրդ փող ունի, անցել է 4 ամիս, այդ 4 մլրդ-ից գոնե մեկը չի հայտնաբերվել»։
Այս ամենով հանդեձ՝ քաղտեխնոլոգը նշեց․ սեպտեմբերի 23-ին, ժամը 20։00-ին, երբ կփակվեն բոլոր ընտրատեղամասերը, Երևանում հեղափոխությունն ու հակահեղափոխությունը կավարտվեն։
Մանրամասները՝ տեսանյութում։
Աղավնի Սուքիասյան
