26.06.2026 | 13:31
Քաղաքացին Նիկոլ Փաշինյանի էլ-փոստին ընտրակաշառք տալու առաջարկ է ուղարկել. նախաձեռնվել է քրեական վարույթ
14 ուսուցիչ այցելել է Միջուկային հետազոտությունների եվրոպական կենտրոն
21.11.2024 | 16:40
Երևանի և Շիրակի, Տավուշի, Արարատի, Արմավիրի մարզերի դպրոցների ֆիզիկայի 14 ուսուցիչներ նոյեմբերի 10-15-ն այցելել են Միջուկային հետազոտությունների եվրոպական կենտրոն (CERN) և այդտեղ գտնվող մեծ հադրոնային կոլայդեր (LHC):
Ուսուցիչների առաջին այցը ֆիզիկայի ոլորտի աշխարհի ամենամեծ գիտական կենտրոն կազմակերպվել էր ՀՀ կրթության, գիտության, մշակույթի և սպորտի նախարարության, Միջուկային հետազոտությունների եվրոպական կենտրոնի, ինչպես նաև Տեսական ֆիզիկայի և մոդելավորման ինստիտուտի համատեղ ջանքերի արդյունքում:
Ուսուցիչները լսել են առաջատար մասնագետների դասախոսություններ, այցելել CERN-ի կառավարման կենտրոն, Նեյտրինո-պլատֆորմ, տվյալների կենտրոն, հականյութի արտադրամաս, Մեծ հադրոնային կոլայդերի ATLAS, ALICE և CMS դետեկտորներ, ինչպես նաև ուսումնասիրել են տարրական մասնիկների գրանցման պատմությունն ու սարքավորումների աշխատանքի սկզբունքները:
Ուսուցիչներին ներկայացվել են նաև դպրոցներում հասանելի միջոցներով տարրական մասնիկների դետեկտորներ սարքելու հմտություններ:Նրանք ծանոթացել են տարրական մասնիկների ֆիզիկայի ժամանակակից զարգացումներին ու խնդիրներին, ինչպես նաև տեսական ու էքսպերիմենտալ զարգացումներին, ներկայացվել են աշխարհահռչակ այս դետեկտորների՝ Հայաստանում արտադրված բաղադրիչները:
Շվեյցարիայի և Ֆրանսիայի սահմանին գտնվող գիտական կենտրոնը միջազգային կազմակերպություն է, որը միավորում է 34 պետությունների ջանքերը՝ տարրական մասնիկների ֆիզիկայի ոլորտում համատեղ հետազոտությունների ու աշխարհի խոշորագույն գիտափորձերի իրականացման համար: CERN-ում աշխատում են 16 000 գիտնականներ՝ աշխարհի 70 երկրներից:
CERN-ի հետազոտություններից 3-ն արժանացել են Նոբելյան մրցանակների: CERN-ում են ծնվել մարդկության զարգացման վրա ազդող այնպիսի գաղափարներ, ինչպիսիք են՝ Համացանցային հաղորդակարգերի հավաքածուն (TCP/IP) և համացանցը («World Wide Web» կամ WWW): Այստեղ են վերջին 70 տարում հայտնաբերվել մի շարք տարրական մասնիկներ (ինչպիսին է՝ Հիգսի բոզոնը), ինչպես նաև հաստատվել է Մասնիկների ֆիզիկայի ստանդարտ մոդելը:
