Զոհված զինծառայողների ընտանիքները Երևանում տրանսպորտից անվճար կօգտվեն․ ՏԵՍԱՆՅՈՒԹ

Մարտական գործողությունների ընթացքում զոհված կամ անհայտ կորած ճանաչված անձանց ընտանիքի անդամները Երևանում տրանսպորտից անվճար կօգտվեն։

Այս մասին որոշումն ընդունվեց Երևանի ավագանու հերթական նիստին ընթացքում՝ «Հանրային ձայն» խմբակցության առաջարկով։

Այս նախագծի շահառու է հանդիսանում 13 500 անձ, որոնք բոլորը Երևանի գրանցում ունեն։ Այսինքն` մարզերից մայրաքաղաք եկող և նույն կարգավիճակն ունեցող անձինք այս փաթեթից օգտվել չեն կարողանա։

Նշենք, որ ավագանին այսօր ընդունել է նաև հանրային տրանսպորտից օգտվողների համար արտոնությունների փաթեթը։ Ըստ նախագծի՝ Երևանի քաղաքային տրանսպորտից անվճար կօգտվեն մինչև 7 տարեկանները, ծնողազուրկ դպրոցականներն ու ուսանողները, հաշմանդամություն ունեցող անձինք (1-ին կամ 2-րդ խմբի), մանկատներում կամ ծերանոցներում գտնվող անձինք, նախկին ԽՍՀՄ, Սոցիալիստական աշխատանքի հերոսները, Հայաստանի ազգային հերոսները, Մարտական խաչի 1-ին և 2-րդ աստիճանի և Փառքի երեք աստիճանի շքանշաններով պարգևատրվածները և բազմազավակ ընտանիքների ծնողները: Զեղչեր կգործեն թոշակառուների, դպրոցականների, ուսանողների և նպաստառուների համար։

Հիշեցնենք, որ հունվարի 1-ից հանրային տրանսպորտից օգտվող քաղաքացիներին վճարման 6 փաթեթ կառաջարկվի։ 1 տարի տրանսպորտից անսահմանափակ օգտվելու համար ուղևորը պետք է վճարի 90 000 դրամ, 90 օր անսահմանափակ քանակությամբ տրանսպորտից օգտվելը կարժենա 24 հազար դրամ, 1 ամսվա անսահմանափակ երթերը կլինեն 9000 դրամ։ Հասարակական տրանսպորտից ավելի քիչ օգտվողների համար քաղաքապետարանը սահմանափակ փաթեթներ է առաջարկում․ օրինակ 1 օրվա ընթացքում 8 անգամ տրանսպորտից օգտվելու համար պետք է 900 դրամ վճարել կամ էլ 300 դրամ տալ և 90 րոպեի ընթացքում 3 անգամ տրանսպորտից օգտվել։ 

Մանրամասները՝ տեսանյութում։