Այս քարոզարշավի ընթացքում ստեղծվել է բավականաչափ նյարդային մթնոլորտ, որտեղ Երևանը երկրորդ պլան է մղվել. Արարատ Զուրաբյան. ՏԵՍԱՆՅՈՒԹ

Հիմա հարցը դրված է այսպես. ո՞վ է մեզ հետ, ո՞վ մեզ հետ չէ: Ով մեզ հետ չէ, նա, չգիտեմ, տարբեր կլիշեներ… Այս քարոզարշավի ընթացքում բազմաթիվ թեկնածուների մոտ Երևան քաղաքը ստորադասվել է, իսկ մենք սեպտեմբերի 23-ին ընտրելու ենք Երևանի քաղաքապետ. այս մասին այսօր լրագրողների հետ հանդիպմանն ամփոփելով քարոզարշավի ընթացքը՝ ասաց Երևանի ավագանու արտահերթ ընտրություններում «Երևանցիներ» դաշինքից քաղաքապետի թեկնածու, ԱԺ «Ծառուկյան» խմբակցության պատգամավոր Արարատ Զուրաբյանը:

«Այս քարոզարշավը բավական յուրահատուկ է, ավելի շատ նման է խորհրդարանական ընտրությունների քարոզարշավին, որովհետև, կարծում եմ, բազմաթիվ թեկնածուների մոտ Երևան քաղաքը ստորադասվել է: Իսկ մենք սեպտեմբերի 23-ին ընտրելու ենք Երևանի քաղաքապետ, որը սեպտեմբերի 24-ից պետք է ստանձնի պարտականություն, որով պետք է իր ծառայությունը մատուցի Երևան քաղաքին»,- հավելեց թեկնածուն:

Արարատ Զուրաբյանի գնահատմամբ՝ ինչ-որ պահից շեղվել ենք ավագանու ընտրություններից, ստեղծվել է բավականաչափ նյարդային մթնոլորտ, որտեղ Երևանը երկրորդ պլան է մղվել. «Բայց սա, հավանաբար, այս ժամանակահատվածի յուրահատկությունն է: Կարծում եմ, որ մեր քաղաքացիները, ի վերջո, ինչ-որ չափով դուրս կգան քարոզարշավի ստեղծած այս հարթակից և, այսպես ասած, կտեղափոխվեն Երևան, կանդրադառնան նրան, թե ինչ է պետք Երևանին, ինչ է պետք անել, որ Երևանը լինի նորմալ, մեր բոլորիս ցանկություններն ու երազանքներն արտահայտող քաղաք»:

Զուրաբյանը նաև թեկնածուների միջև բանավեճերի անհրաժեշտություն է տեսնում՝ Երևանին վերաբերող հարցերի, տեսլականների, ծրագրերի և մոտեցումների շուրջ: Դա նաև երևանցիներին կօգներ կողմնորոշվելու հարցում: «Հիմա հարցը դրված է այսպես. ո՞վ է մեզ հետ, ո՞վ մեզ հետ չէ: Ով մեզ հետ չէ, նա, չգիտեմ, տարբեր կլիշեներ… Էլի եմ ասում, մենք որոշակիորեն շեղվել ենք Երևանից: Սա ասում եմ ցավով, իսկ Երևանն ունի բազմաթիվ խնդիրներ, որոնց քաղաքապետի թեկնածուները պարտավոր են անդրադառնալ, բանավիճել, և երևանցին կողմնորոշվի, թե ում է տեսնելու Երևանի քաղաքապետի պաշտոնում»,- ասաց քաղաքապետի թեկնածուն:

Մանրամասները՝ տեսանյութում: