Ղազախական ընկերությունները ՌԴ-ի համար սարքեր են գնել արևմտյան երկրներից, որոնք օգտագործվել են ՌԷՊ միջոցների ստեղծման համար

Ղազախական ընկերությունները սարքեր են գնել Եվրոպայից, Ասիայից և Ամերիկայից, որոնք այնուհետև մատակարարվել են Ռուսաստան և կարող են օգտագործված լինել ռադիոէլեկտրոնային պայքարի (ՌԷՊ) համակարգեր ստեղծելու համար, պարզել է The Insider-ը, որին վկայակոչում է Current time-ը։

Նշվում է, որ Askarlab, Dicosta Technologies, Panalem Technologies and Computer Services ընկերությունները, որոնք գրանցված են Ղազախստանում, ապրանքներ են ձեռք բերել Rohde & Schwarz (Գերմանիա), Safran Data Systems (Ֆրանսիա), Mini-Circuits (ԱՄՆ), Farran Technology (Իռլանդիա) և այլ ընկերություններից 2023-2024 թվականներին, այնուհետև դրանք վերաուղղել Ռուսաստանի Դաշնություն։

Պարզվել է, որ միայն Askarlab-ը 2023 թվականի նոյեմբերից գնել է շուրջ 2 միլիոն դոլար արժողությամբ բարձրակարգ ռադիոսարքավորումներ:

«Ներմուծվող ապրանքների թվում են եղել ռադիոհաճախականության զտիչներ, ռադիոհաճախականության ադապտերներ, ուժեղացուցիչներ, ատենուատորներ, հաճախականության ընդլայնիչներ, թուլացնողներ, արբանյակային մոդեմներ, վեկտորային ցանցի անալիզատորներ և այլ սարքավորումներ»,- նշել են լրագրողները։

The Insider-ի տրամադրության տակ է հայտնվել Askarlab-ի տնօրեն Ալեքսանդր Լիսիցինի նամակագրությունը (նախկինում նա ղեկավարել է վերոհիշյալ Computer Services-ը), որը խոստացել է պատժամիջոցների ենթարկված ռուսական Dipol ընկերությանը մատակարարել իսպանական Keysight Technologies-ի սարքավորումներ:

Ռազմական փորձագետ Լեոնիդ Դմիտրիևը նշել է, որ այս և այլ արևմտյան ընկերությունների արտադրանքն ակտիվորեն օգտագործվում է ռուսական ռադիոէլեկտրոնային հետախուզական արբանյակների և «Լիանա» համակարգի կատարելագործման մեջ։

Ալմաթիում գտնվող Dicosta-ն 2023 թվականի նոյեմբերից ներմուծել է 1 միլիոն դոլար արժողությամբ Keysight սարքավորումներ։

Ղազախստանի և Ռուսաստանի մաքսային փաստաթղթերի հիման վրա լրագրողները պարզել են, որ օտարերկրյա ապրանքներն օդային ճանապարհով առաքվել են Ալմաթիի Ժետիսու մաքսակետ, որտեղից դրանց մի մասն ուղարկվել է Ռուսաստան։

Լրագրողները Մոսկվայից գնորդների անվան տակ կապվել են ղազախական Dicosta-ի հետ՝ Keysight-ի արտադրանքը պատվիրելու համար, ինչպես նաև հետաքրքրվել Askarlab-ի միջոցով Rohde & Schwarz ապրանքների գնման մասին։ Ի պատասխան՝ համաձայնել են ուղարկել իրենց գնումների գնացուցակը և առաջարկել են նրանց կապել Ալմաթիում Rohde & Schwarz ընկերության ներկայացուցչի հետ։

Թարգմանությունը՝ Էմմա Չոբանյանի