Էրդողանը պատմել է Թրամփի հետ «անկեղծ զրույցի» և նրան Թուրքիա հրավիրելու մասին

Թուրքիայի նախագահ Ռեջեփ Թայիփ Էրդողանը Բուդապեշտից վերադառնալիս ինքնաթիռում լրատվամիջոցների հետ զրույցում խոսել է ԱՄՆ նախագահական ընտրություններում Դոնալդ Թրամփի հաղթանակի մասին։ Նա հույս է հայտնել, որ ընտրություններն օգուտ կբերեն ԱՄՆ-ին, տարածաշրջանին և աշխարհին։

Էրդողանը նշել է, որ Թրամփն ընտրական գործընթացի ժամանակ բազմաթիվ դժվարությունների, այդ թվում՝ մահափորձի դեմ է պայքարել և հիանալի օրինակ ցույց տվել, այդ ընթացքում նրա հետ է եղել միայն Իլոն Մասկը։ Թուրքիայի նախագահը նաև պատմել է Թրամփի հետ ընտրություններից հետո տեղի ունեցած հեռախոսազանգի մասին։

«Մենք անկեղծ զրույց ունեցանք պարոն Թրամփի հետ։ Նրանք այդ ժամանակ ընտանեկան ընթրիքի էին։ Իլոն Մասկը և նրա երեխան եղել են նրա հետ։ Մենք քննարկել ենք ընտրական գործընթացը և Թուրքիայի ու Միացյալ Նահանգների համագործակցությունը։ Նրան հրավիրել ենք մեր երկիր։ Հուսով եմ, որ նա կընդունի մեր հրավերը՝ այդպիսով ամրապնդելով Թուրքիայի և Միացյալ Նահանգների համագործակցությունն այլ կերպ, քան նախկինում։ Մեր և ԱՄՆ-ի միջև F-35-ի խնդիրը կա, C-400-ի հետ կապված գործընթաց կա։ Թրամփի նախագահության ժամանակ Թուրքիայի մասին խոսելիս F-35-ի հետ կապված նա ասել է՝ «Փողը տվել են, իսկ դուք էլի չե՞ք տալիս ինքնաթիռները»։ Տեսնենք՝ նոր ժամանակաշրջանում ինչի վրա ենք հիմնվելու և ինչպե՞ս ենք շարունակելու մեր ճանապարհը»,- ասել է Թուրքիայի նախագահը։

Անդրադառնալով ԱՄՆ-ից ակնկալիքներին՝ Էրդողանն ասել է, որ այժմ Թուրքիան կանգնած է բազմաթիվ մարտահրավերների առաջ, հատկապես՝ Պաղեստինի և Ռուսաստան-Ուկրաինա ճգնաժամի հարցերով։

«Դրանք հնարավոր է հաղթահարել Թուրքիայի և ԱՄՆ-ի համագործակցությամբ։ Հուսով եմ, որ տարածաշրջանային և համաշխարհային պատերազմներն ու ճգնաժամերը կավարտվեն Թրամփի նախագահությամբ։ Կշարունակենք մեր բանակցությունները Դոնալդ Թրամփի հետ նոր ժամանակաշրջանում և կքննարկենք, թե ինչպես կձևավորենք զարգացումները Մերձավոր Արևելքում»,- հավելել է նա։

Թուրքիայի նախագահը հույս է հայտնել, որ Սպիտակ տան նոր ղեկավարը կկատարի հակամարտությունները դադարեցնելու իր խոստումը։

Թարգմանությունը՝ Էմմա Չոբանյանի