09.09.2026 | 11:04
ԱԺ ֆինանսավարկային և բյուջետային հարցերի մշտական հանձնաժողովի նիստը․ ՈՒՂԻՂ
Թրամփը կարող է Ուկրաինային առաջարկել 20 տարով հրաժարվել ՆԱՏՕ-ին անդամակցելուց և սառեցնել պատերազմը ռազմաճակատի գծով․ WSJ
Քաղաքականություն
07.11.2024 | 15:31
ԱՄՆ նորընտիր նախագահ Դոնալդ Թրամփը կարող է Ուկրաինային առաջարկել սառեցնել ռազմական հակամարտությունը Ռուսաստանի հետ՝ առանց տարածքները վերադարձնելու, և հրաժարվել ՆԱՏՕ-ին անդամակցելուց առնվազն 20 տարով, հայտնել են իրազեկ աղբյուրները The Wall Street Journal-ին։
Նրանց խոսքով՝ Թրամփի խորհրդականները ներկայում քննարկում են պատերազմի ավարտի նման սցենարը։ Ենթադրվում է, որ ռազմական գործողությունների սառեցումից հետո ճակատային գծի ամբողջ երկայնքով ապառազմականացված գոտի կհայտարարվի։ Իսկ թե ով կապահովի դրա անվտանգությունը, առայժմ հայտնի չէ։
Միևնույն ժամանակ, WSJ-ի զրուցակիցներից մեկը բացառել է, որ անվտանգության ապահովման գործում ներգրավված կլինեն ամերիկյան զորքերը կամ ՄԱԿ-ի զորակազմը։
Բացի այդ, առաջիկա 20 տարում ՆԱՏՕ-ին անդամակցելուց հրաժարվելու դիմաց Թրամփը խոստանալու է շարունակել Ուկրաինային զենք մատակարարել։
«Մենք կարող ենք [զինվորականներին] պատրաստել և այլ աջակցություն ցուցաբերել, բայց դրանով առաջին հերթին կզբաղվեն եվրոպական երկրները: Մենք ամերիկացի տղամարդկանց և կանանց չենք ուղարկում Ուկրաինա՝ խաղաղություն պահպանելու համար։ Եվ մենք դրա համար չենք վճարում: Խնդրեք լեհերին, գերմանացիներին, բրիտանացիներին և ֆրանսիացիներին դա անել»,- ասել է Թրամփի թիմի անդամներից մեկը։
Միաժամանակ, WSJ-ի զրուցակիցներն ընդգծել են, որ Թրամփը դեռևս չի հաստատել Ուկրաինայում ռազմական հակամարտությունը դադարեցնելու կոնկրետ ծրագիր։ Հանրապետական գործչի ազգային անվտանգության հարցերով նախկին օգնականը նշել է, որ Թրամփը որոշում կկայացնի անձամբ և ամենավերջին պահին, ուստի ոչ ոք չի կարող նախապես ասել, թե նորընտիր նախագահն ինչ կորոշի։
Թարգմանությունը՝ Տաթև Ֆռանգյանի
