Վրաստանում ընտրությունների ձայների մասնակի վերահաշվարկը հաստատել է ԿԸՀ-ի տվյալները

Վրաստանում խորհրդարանական ընտրությունների քվեաթերթիկների մասնակի վերահաշվարկը հաստատել է իշխող «Վրացական երազանք» կուսակցության հաղթանակը, գրում է DW-ն՝ վկայակոչելով երկրի Կենտրոնական ընտրական հանձնաժողովը։

ԿԸՀ-ի հայտարարության մեջ ասվում է, որ ընտրատեղամասերի 12 տոկոսի քվեաթերթիկների վերահաշվարկը, որտեղ քվեարկել է ընտրողների 14 տոկոսը, «նախապես հայտարարված պաշտոնական արդյունքների էական փոփոխության չի հանգեցրել»։ Եզրափակիչ արձանագրությունները «միայն աննշան փոխվել են» վերահաշվարկված ընտրատեղամասերի ինը տոկոսում, ասվում է հաղորդագրությունում:

Ձայների վերահաշվարկն արվել է հոկտեմբերի 29-ին։ Վերահաշվարկի տեղամասերն ընտրվել են վիճակահանությամբ։

Հոկտեմբերի 30-ին Վրաստանի դատախազությունը հայտարարել է, որ հետաքննություն է սկսել երկրի նախագահ Սալոմե Զուրաբիշվիլիի և ընդդիմության ներկայացուցիչների՝ խորհրդարանական ընտրությունները կեղծելու մասին հայտարարությունների վերաբերյալ։ Զուրաբիշվիլին հրավիրվել է դատախազություն՝ բացատրություններ տալու։ Նախագահը դա անտեղի է համարել և հրաժարվել է գնալ, քանի որ, ըստ նրա, դատախազներն իրենք պետք է կատարեն նախաքննությունը։

Վրաստանում խորհրդարանական ընտրությունները տեղի են ունեցել հոկտեմբերի 26-ին։ Կենտրոնական ընտրական հանձնաժողովի տվյալներով՝ իշխող «Վրացական երազանք» կուսակցությունը ստացել է ձայների 53,9 տոկոսը, սակայն ընդդիմությունը համաձայն չէ արդյունքների հետ։ Զուրաբիշվիլին ընտրություններն անվանել է «ամբողջական կեղծիք» և հայտարարել, որ չի ճանաչում դրանք, իսկ հինգ տոկոսի շեմը հաղթահարած բոլոր չորս ընդդիմադիր կուսակցությունները հայտարարել են, որ բոյկոտելու են նոր խորհրդարանի աշխատանքը։

Թարգմանությունը՝ Տաթև Ֆռանգյանի