Արայիկ Հարությունյանն ուղիղ չպատասխանեց` Ադրբեջանի պահանջով ՀՀ Սահմանադրությունը կփոխե՞ն, թե` ոչ․ ՏԵՍԱՆՅՈՒԹ

Հայաստանը Փաշինյան-Ալիև բոլոր հանդիպումները երկխոսության առումով դրական է գնահատում, այս մասին լրագրողներին ասաց վարչապետի աշխատակազմի ղեկավար Արայիկ Հարությունյանը։ «Վստահաբար, մենք միտված ենք նրան, որ նախաձեռնված գործընթացներն ու խաղաղության պայմանագրի ստորագրումն առաջիկայում իրականություն դառնան»,- ասաց նա։ Հարությունյանի խոսքով՝ Փաշինյան-Ալիև շփումներն օգուտ տալիս են։

Ըստ նրա՝ հայկական կողմը տեսնում է, որ հնարավորություն կա համաձայնեցնելու խաղաղության պայմանագրի չհամաձայնեցված կետերը։ Հարությունյանը մանրամասներ չհայտնեց, թե ինչ հարցեր են քննարկել Փաշինյանն ու Ալիևը Կազանում, միայն ասաց, թե քննարկվել է սեղանին դրված հարցերի լայն շրջանակ։ Վարչապետի աշխատակազմի ղեկավարը կարծում է, որ ցանկացած խաղաղության պայմանագիր արդյունավետ է լինում, երբ լինում են փոխզիջումներ։

«Այս պահին պայմանագրի խմբագրված տարբերակները գտնվում են կողմերի մոտ, երբ նոր խմբագրումներ ու տարբերակներ լինեն, փոխանակումներ լինեն, հանդիպումների անհրաժեշտություն լինի՝ դրանք կլինեն»,- նշեց նա։ ՀՀ-ն պատրա՞ստ է Սահմանադրության փոփոխության հետ կապված քայլերի․ այս հարցին Արայիկ Հարությունյանն արձագանքեց՝ մենք բազմիցս ասել ենք ,ունենք կարմիր գծեր և այդ մասին հայտնել ենք։ Ինչո՞ւ հստակ չեք ասում՝ ՀՀ սահմանադրությունը չենք փոխելու Բաքվի պահանջով․ այս հարցադրմանն ի պատասխան վարչապետի աշխատակազմի ղեկավարը միայն նշեց, որ դրա մասին բազմիցս հայտարարվել է։

Մանրամասները` տեսանյութում։