Ալիկ Սարգսյանը սպասում է, թե երբ իրեն ՀՔԾ կհրավիրեն

Հայաստանի նախկին ոստիկանապետ, ԱԺ ՀՀԿ խմբակցության պատգամավոր Ալիկ Սարգսյանին Հատուկ քննչական ծառայություն դեռևս չեն հրավիրել: Factor.am-ի հետ զրույցում պատգամավորը հայտնեց, որ ինքը սպասման մեջ է և գործի ընթացքի հետ կապված մանրամասների չի տիրապետում: «Ես դիմել եմ դատարան, պատիվ եմ պահանջում: Ընդհանրապես որևէ թեմա չկա, իրենք իրենց սև գործն արել են՝ մարդուն վարկաբեկելով, հիմա իմ հերթն է, որ պատիվ պահանջեմ»,- նշեց Ալիկ Սարգսյանը՝ կրկին պնդելով, որ ինքը կապ չունի այն անձանց հետ, որոնք իրեն մեղադրում են «բիզնես խլելու» մեջ:

Հիշեցնենք՝ ավելի քան երկու շաբաթ առաջ հայտնի դարձավ, որ ՀՀ քննչական կոմիտեի ՀԿԳ քննության գլխավոր վարչության կոռուպցիոն, սեփականության դեմ ուղղված հանցագործությունների և կիբերհանցագործությունների քննության վարչության վարույթում քննվող քրեական գործով փաստական տվյալներ են ձեռք բերվել Հայաստանի նախկին վարչապետ Հովիկ Աբրահամյանի, նրա եղբայր Հենրիկ (Ջոնիկ) Աբրահամյանի, ինչպես նաև ՀՀ նախկին ոստիկանապետ, ԱԺ պատգամավոր Ալիկ Սարգսյանի կողմից պաշտոնեական լիազորություններն անցնելու, խարդախություն կատարելու առերևույթ դեպքերի վերաբերյալ և որոշում կայացվել քրեական գործն ուղարկել ՀՔԾ:

Քրեական գործի շրջանակում պարզվել էր, որ դեռ 2000 թվականին հիմնադրված «Ավազահատիկ» ընկերությունը Արարատի մարզում զբաղվել է հանքարդյունաբերությամբ՝ ներգրավելով վարկային միջոցներ, կատարել է շուրջ 80 հազար դոլարի ներդրում, ձեռք է բերել ավազի լվացման և մաղման հոսքագծեր։ Սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ՝ պահանջելով ընկերության բաժնեմասերի 60 տոկոսը՝ նշելով, որ հակառակ պարագայում հանքերը չեն շահագործվի, ընդ որում, բաժնեմասերի 60 տոկոսը պահանջել են ձևակերպել երկու տարբեր անձանց անունով՝ յուրաքանչյուրին 30 տոկոս։

Ավելի ուշ «Ֆեյսբուք»-ի իր էջում կատարած գրառմամբ նախկին վարչապետ Հովիկ Աբրահամյանը տեղեկացրել էր, որ Հատուկ քննչական ծառայությունում իրեն մեղադրանք են առաջադրել և երկրից չհեռանալու մասին ստորագրություն վերցրել: Նախկին վարչապետը գործը որակել է շինծու:

«ՀՔԾ-ում ինչ-որ շինծու քրեական գործով ինձ նախ հարցաքննեցին որպես վկա, ապա դրանից անմիջապես հետո անհիմն մեղադրանք առաջադրեցին և ստորագրություն վերցրեցին՝ երկրից չհեռանալու մասին: Զավեշտալի է, երբ ոչ ականջահաճո հարցազրույցից հետո մարդուն հրավիրում են ՀՔԾ, ակնհայտ կեղծ մեղադրանք առաջադրում՝ նպատակ ունենալով լռեցնել ցանկացած այլակարծություն: Այս պահին նպատակահարմար չեմ համարում ավելին ասել, հետագայում այդ անհիմն մեղադրանքին և անօրինականություններին առավել մանրամասն անդրադառնալու առիթ կունենամ: Առայժմ արձանագրեմ, որ ՀՀ իշխանությունների կողմից իրականացվող «մարդաորսը», ազատ խոսքի ու այլակարծության ճնշմանն ուղղված գործողությունները լավ հանգրվան չեն ունենալու»,- գրել էր նախկին վարչապետը: