Հեղափոխություն կլինի՞ Վրաստանում․ ընդդիմությունը հանրահավաք է հրավիրել․ զրույց Արսեն Խառատյանի հետ․ ՏԵՍԱՆՅՈՒԹ

ԱՄՆ պետքարտուղար Էնթոնի Բլինքենը Վրաստանի ԱԺ ընտրության մասին իր հայտարարությունն սկսել է նշումով, որ «միջազգային դիտորդները չեն ճանաչել ընտրությունների արդյունքները որպես ազատ և արդար»։ Վաշինգտոնը դատապարտել է միջազգային նորմերի բոլոր խախտումները, և կոչ է արել քննություն իրականացնել։ ԱՄՆ-ն նշում է նաև, որ դիտորդներն արձանագրել են մթնոլորտ, որը բնութագրվում է իշխող կուսակցության կողմից հանրային ռեսուրսների չարաշահմամբ, ձայների գնմամբ և ընտրողների ահաբեկմամբ, ինչը ստեղծել է անհավասար դաշտ, խաթարել է հասարակության և միջազգային վստահությունը արդար արդյունքի հնարավորության նկատմամբ։ ԵՄ-ն կոչ է արել հետաքննել խախտումները։ ԵՄ խորհրդի նախագահ Շառլ Միշելը նաև կոչ է արել Վրաստանի կառավարությանը հավաստիացնել իր հավատարմությունը Եվրոպական ապագայի նկատմամբ։ Վրաստանի ընտրությունների արդյունքները չեն ճանաչել նաև նախագահ Սալոմե Զուրաբիշվիլին, և 4 ընդդիմադիր ուժերը՝ «Հանուն փոփոխությունների դաշինքը», «Միասնություն՝ փրկելու Վրաստանը», «Ուժեղ Վրաստանը» և «Հանուն Վրաստանին»։ Այսօր հանրահավաք է սպասվում։

«Ալիք Մեդիայի» հիմնադիր Արսեն Խառատյանին Factor TV-ի հետ զրույցում հարց ուղղեցինք՝ Վրաստանում հեղափոխություն իրականացնելու պոտենցիալ կա՞, արդյո՞ք այս ընտրությունը զրկեց Վրաստանին եվրոպական ապագայից։ Արսեն Խառատյանը պնդում է՝ այս հարցի պատասխանը նաև բխում է այն խնդրից, թե արդյո՞ք ընդդիմադիր 4 ուժերը կկարողանան իրենց միջից ընդդիմության լիդեր ընտրել, ով առաջ կտանի հետընտրական պրոցեսները։

«Այս պահին ընդդիմադիր ուժերն ունեն հասարակության աջակցությունը և ականկալիքները մեծ են։ Թբիլիսիում իշխանական կուսակցությունը պարտություն կրեց՝ հավաքելով ընդդիմադիր 4 ուժերից քիչ ձայն, և մայրաքաղաքում վստահաբար փողոց դուրս է գալու քաղհասարակությունը, հասարակության քաղաքականացված հատվածը։ Չգիտեմ, թե ինչ մասշտաբներով դուրս կգան փողոց, շատ բան կախված է օրակարգից, որն առաջարկվելու է։ 2004-ին «Վարդերի հեղափոխության» ժամանակ ընդդիմությունը էլի չընդունեց ընտրությունների արդյունքները, դուրս եկավ փողոց, բայց այնտեղ առանցքային մի բան տեղի ունեցավ՝ վարչապետ Զուրաբ Ժվանիան հրաժարական տվեց և միացավ ընդդիմությանը։ Հիմա խիստ կասկածում եմ, որ դրա հավանականությունը կա»,- ասաց Արսեն Խառատյանը, ում մուտքը Վրաստան արգելված է այդ երկրի իշխանությունների կողմից։ Նա պնդեց, որ շատ բան կախված կլինի այսօր 19։00-ին հրավիրված հանրահավաքից։

Հարցազրույցն ամբողջությամբ՝ տեսանյութում։

Ռոբերտ Անանյան