Քաղաքականություն
13.09.2018 | 20:43
ՀՀ-ում ԱՄՆ դեսպանատունը նշում է, որ Միացյալ Նահանգները ուշադիր հետևում է Սիրիայի Իդլիբ նահանգում տիրող իրավիճակին, սակայն Սիրիայում Հայաստանի ենթադրվող առաքելության մասին մեկնաբանություն չի անում. փոխանցում է Արմենպրեսը:
Հարցին՝ արդյո՞ք Հայաստանը կարող է հայտնվել ամերիկյան պատժամիջոցների տակ, եթե Ռուսաստանի հետ «հումանիտար համագործակցության» շրջանակում զինվորականներ ուղարկի Սիրիա, մասնավորապես՝ ռազմական բժիշկների և սակրավորների, ԱՄՆ դեսպանատունը պատասխանել է․
«Սիրիայի հայկական բնակչությանն օգնելու ՀՀ կառավարության ցանկությունը հասկանալի է: ԱՄՆ-ն ևս մտահոգ է Սիրիայի պատերազմի մարդասիրական հետևանքներով և խաղաղ բնակչության դժվարին վիճակով: Սիրիայում Հայաստանի ենթադրվող առաքելության մասին մեկնաբանություններ չենք կարող տալ, սակայն նշենք, որ Միացյալ Նահանգներն ուշադիր հետևում է Սիրիայի Իդլիբ նահանգում տիրող իրավիճակին, որտեղ երեք միլիոն անմեղ քաղաքացիական բնակչություն գտնվում է շրջապատման մեջ ու նրանց սպառնում է հարձակում Ասադի ռեժիմի կողմից, որին սատարում են Ռուսաստանն ու Իրանը»:
