Քաղաքականություն
26.10.2024 | 18:31
Հայաստանի Հանրապետությունը կարևորում է ԵՄ դիտորդական առաքելության մանդատի երկարաձգումը և հետագա գործունեությունը՝ դրական գնահատելով ԵՄ դիտորդական առաքելության գրեթե երկամյա գործունեությունը: Այս մասին Factor.am-ի գրավոր հարցմանն ի պատասխան հայտնել են ՀՀ ԱԳՆ-ից՝ պատասխանելով հարցին՝ արդյո՞ք դիտորդական առաքելության ժամկետը երկարաձգվելու է, և արդյո՞ք նախատեսվում է առաքելության անձնակազմի ավելացում։
Արտգործնախարարությունը միևնույն ժամանակ չի պատասխանել հարցին՝ արդյո՞ք Ադրբեջանը որպես խաղաղության պայմանագրի պայման առաջ քաշել է Հայաստանից ԵՄ դիտորդների դուրսբերումը։
Նշենք, որ հոկտեմբերի 14-ին Ադրբեջանի նախագահ Իլհամ Ալիևը դարձյալ հայտարարել էր, թե Հայաստանի տարածքում ԵՄ-ի դիտորդական առաքելության գործունեությունն անընդունելի է և «անվստահություն է առաջացնում Բաքվի և Բրյուսելի միջև հարաբերություններում»։
ԱԺ-Կառավարություն հարցուպատասխանի ժամանակ ԱԳ նախարար Արարատ Միրզոյանն արձագանքել էր ՀՀ-ում ԵՄ առաքելության վերաբերյալ Ադբեջանի նախագահ Իլհամ Ալիևի հայտարարություններին:
Նախարարը հայտնել էր, որ ԵՄ-ն լրջորեն դիտարկում է այդ մանդատի երկարաձգման հարցը:
«Մեր տեսանկյունը սա է՝ քանի դեռ մենք Ադրբեջանի հետ չունենք վավերացված համաձայնագիր, քանի դեռ չունենք առաջ գնացող, ավարտվող սահմանազատման գործընթաց, խաղաղություն, մենք ունենք մտավախություններ Ադրբեջանի գործողությունների մասով և ունենք չեզոք երրորդ կողմի օբյեկտիվ գնահատականների կարիք, սահմանի երկայնքով մշտադիտարկման ակնկալիք»,- նշել էր Արարատ Միրզոյանը։
Հիշեցնենք, որ ԵՄ դիտորդական առաքելությունը Հայաստանում հայ-ադրբեջանական սահմանին պարեկություն է իրականացնում 2022 թվականի հոկտեմբերի 20-ից։ Հայաստանում ԵՄ առաքելության մանդատը նախատեսվում է մինչև 2025 թվականի սկիզբը։
Մանյա Պողոսյան
