04.08.2026 | 23:29
Չժաո Լեցզին շնորհավորել է Ռուբեն Ռուբինյանին ԱԺ նախագահ ընտրվելու կապակցությամբ
Թուրքիայի ՆԳՆ-ն հայտնել է PKK-ի 176 անդամների ձերբակալության մասին
Քաղաքականություն
25.10.2024 | 17:36
Թուրքիայի ներքին գործերի նախարար Ալի Երլիքայան հայտնել է, որ անվտանգության ուժերը 31 բնակավայրերում ուժեղացված ստուգումներ են անցկացրել և ձերբակալել երկրում արգելված Քուրդիստանի աշխատավորական կուսակցության (PKK) 176 անդամի։ Նախարարի խոսքով՝ ձերբակալվածների բնակության վայրերում խուզարկությունների ժամանակ հայտնաբերվել են թմրանյութեր և հրազեն, ինչպես նաև ահաբեկչական գործունեությունը հաստատող փաստաթղթեր։
«Մենք վճռականորեն կշարունակենք պայքարել մինչև վերջին ահաբեկչի չեզոքացումը՝ հանուն մեր ազգի խաղաղության, միասնության և համերաշխության»,- TRT Haber-ի փոխանցմամբ՝ գրել է Երլիքայան սոցցանցում։
Հոկտեմբերի 23-ին Անկարայում TUSAS-ի կենտրոնակայանի մուտքի մոտ երկու պայթյուն է որոտացել, որից հետո փոխհրաձգություն է սկսվել։ Զոհվել է 5 մարդ, ևս 22-ը՝ վիրավորվել։ Սպանվել են նաև ահաբեկչության երկու մասնակիցները։
Թուրքիայի ներքին գործերի նախարարությունը հայտարարել է, որ հարձակման հետևում կանգնած է Քուրդիստանի աշխատավորական կուսակցությունը: Հոկտեմբերի 24-ի գիշերը Թուրքիայի ռազմաօդային ուժերը Սիրիայում և Իրաքում հարձակում են գործել կազմակերպության 32 թիրախների վրա։
Թարգմանությունը՝ Տաթև Ֆռանգյանի
