30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Վրաստանի խորհրդարանի նախագահը հայտարարել է որոշակի ուժերի կողմից հեղաշրջում նախապատրաստելու մասին
Քաղաքականություն
23.10.2024 | 17:07
Վրաստանի խորհրդարանի նախագահ Շալվա Պապուաշվիլին հայտարարել է որոշակի ուժերի գոյության մասին, որոնք հոկտեմբերի 26-ի ընտրություններից հետո հեղաշրջում են նախապատրաստում։ Այս մասին նա ասել է հոկտեմբերի 23-ին կայացած ճեպազրույցում, փոխանցում է Current Time-ը։
Նրա խոսքով՝ «որոշ խմբեր» պատրաստվում են երկրի իշխանությունը փոխել հասարակական կազմակերպությունների օգնությամբ, որոնք, «ինչպես 2020 թվականին, պետք է ընտրությունների վերաբերյալ ոչ ճիշտ հաշվետվություններ պատրաստեն»։ Պապուաշվիլին պնդում է՝ տեղի դիտորդների կողմից «առնվազն տեղեկատվական աղմուկ» ստեղծելու փորձեր կան։
Շալվա Պապուաշվիլին, որն իշխող «Վրացական երազանք» կուսակցության քաղխորհրդի անդամ է, ավելի վաղ հայտարարել էր, որ «ընդդիմության, նրա հետ կապված լրատվամիջոցների և հասարակական կազմակերպությունների վերջին գործողությունները հաստատում են, որ կեղծ պատրվակ է ստեղծվում ընտրությունների արդյունքները չճանաչելու համար»։ Նա այսպես է մեկնաբանել Վրաստանի Պետական անվտանգության ծառայության տեղեկությունը, որում ասվում է, որ «խորհրդարանական ընտրությունների նախաշեմին իշխանություններին վարկաբեկելու համար ընդդիմությունը նախատեսում է հրապարակել արհեստական բանականության միջոցով ստեղծված տեսանյութեր»։
Պետական անվտանգության ծառայության տվյալներով՝ կեղծ ձայնագրություններում օգտագործվելու են Վրաստանի կառավարության ներկայացուցիչների ձայներն ու տեսագրությունները։
Թարգմանությունը՝ Տաթև Ֆռանգյանի
