30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Իսրայելը հարվածներ է հասցրել «Հըզբոլլահ»-ի ֆինանսական կառույցին՝ թիրախավորելով Բեյրութի հարավը
Քաղաքականություն
21.10.2024 | 13:59
Իսրայելի զինված ուժերը հայտարարել են, որ հիմա էլ թիրախավորում են «Հըզբոլլահ»-ի ֆինանսական թևը և հարձակվելու են «մեծ թվով թիրախների» վրա Բեյրութում և այլուր: Պայթյունները սկսվել են Բեյրութի հարավային արվարձաններում այս հայտարարությունից շուրջ մեկ ժամ անց, գրում է AP-ն։
Տարհանման նախազգուշացումները վերաբերվել են հարավային Բեյրութի, արևելյան Բեքաա հովտի և հարավային Լիբանանի որոշ հատվածներին։
Իսրայելի հետախուզության բարձրաստիճան պաշտոնյան ասել է, որ հարվածները հասցվելու են «Ալ-Քարդ-ալ-Հասանին» «ամբողջ Լիբանանում»: Պաշտոնյան անանունության պայմանով ասել է, որ «Ալ-Քարդ ալ-Հասան»-ը «Հըզբոլլահ»-ի ստորաբաժանումն է, որն օգտագործվում է Իրանի կողմից աջակցվող զինյալ խմբավորման գրոհայիններին վճարելու և զենք գնելու համար:
Գրանցված ոչ առևտրային այս կազմակերպությունը, որի նկատմամբ պատժամիջոցներ են սահմանել ԱՄՆ-ն և Սաուդյան Արաբիան, տրամադրում է ֆինանսական ծառայություններ և օգտագործվում է նաև սովորական լիբանանցիների կողմից: Դրա անունն արաբերեն նշանակում է «բարեգործական փոխառություն», և «Հըզբոլլահ»-ն այն օգտագործում է շիա բնակչության շրջանում իր աջակցությունը հաստատելու համար մի երկրում, որտեղ պետական և ֆինանսական հաստատությունները վերջին տարիներին ձախողված վիճակում են։
Թարգմանությունը՝ Էմմա Չոբանյանի
