21.10.2024 | 13:38
Կարևոր է երկրում իրավունքի ու արդարության ստանդարտ ունենալը․ Փաշինյան․ ՏԵՍԱՆՅՈՒԹ
Մոլդովայի ընտրություններում առաջատարը Մայա Սանդուն է․ եվրաինտեգրման հանրաքվեում ձայները գրեթե հավասարապես են բաժանվել
Քաղաքականություն
21.10.2024 | 11:40
Մոլդովայում անցկացված ընտրությունների նախնական արդյունքներով՝ նախագահ Մայա Սանդուն անցնում է երկրորդ փուլ նախկին գլխավոր դատախազ Ալեքսանդր Ստոյանոգլոյի հետ միասին, գրում է BBC-ի ռուսական ծառայությունը։
Սանդուն ընտրությունների բացահայտ ֆավորիտն էր, սակայն սոցհարցումները թույլ չէին տալիս հստակ կանխատեսել՝ կպահանջվի՞ երկրորդ փուլ, թե՞ նա կհաղթի առաջին փուլում։
Քվեների 98%-ի հաշվարկի արդյունքներով՝ գործող նախագահը հավաքել է ձայների գրեթե 42%-ը, նախկին գլխավոր դատախազ Ստոյանոգլոն՝ 26%-ից մի փոքր ավելին։
Նախագահական ընտրություններին զուգահեռ՝ եվրաինտեգրման հարցով հանրաքվե է անցկացվել։ Ընտրողներին առաջարկվել է պատասխանել հարցին՝ ինչպե՞ս են վերաբերվում հարցին, որ Եվրամիությանն ինտեգրվելու երկրի կուրսը նշվի Սահմանադրության նախաբանում, ինչպես նաև այն, որ Մոլդովայի ապագա միացումը ԵՄ հիմնարար պայմանագրերին իրականացվի խորհրդարանի սահմանադրական կազմի մեծամասնության քվեարկությամբ։
Դարձյալ ձայների 98%-ի հաշվարկի արդյունքներով՝ երկրի հիմնական օրենքում եվրաինտեգրման քաղաքականության ներմուծման օգտին քվեարկել է 50,03%-ը, դեմ՝ 49.97%-ը՝ «ոչ»։ Հանրաքվեից առաջ անցկացված նախնական հարցումները ցույց էին տալիս եվրաինտեգրման կողմնակիցների շատ ավելի վստահ հաղթանակ։
Քվեարկությունից հետո իր առաջին հրապարակային ելույթում Մայա Սանդուն «որոշ հանցավոր խմբերի և թշնամական արտաքին ուժերի» մեղադրել է ընտրողներին լայնածավալ կաշառելու փորձի մեջ:
«Մենք հստակ ապացույցներ ունենք, որ հանցավոր խմբավորումները պատրաստվում էին գնել 300 հազար ձայն։ Սա աննախադեպ մասշտաբի խարդախություն է։ Մենք չենք նահանջելու, շարունակելու ենք պաշտպանել մեր ժողովրդավարությունն ու ազատությունը։ Մենք սպասում ենք վերջնական արդյունքներին և կպատասխանենք հստակ որոշումներով»,- հայտարարել է Սանդուն։
Թարգմանությունը՝ Էմմա Չոբանյանի
