06.12.2025 | 12:34
Մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Բաքուն կրկին հայտարարել է, որ ՀՀ-ին COP29-ին մասնակցության հրավեր է ուղարկվել
Քաղաքականություն
18.10.2024 | 18:09
Բաքուն կրկին հայտարարում է, որ հայկական կողմին COP29-ին մասնակցության հրավեր է ուղարկվել։ COP-ը ՄԱԿ-ի կլիմայական համաժողովն է, որին մասնակցության հրավերներ ուղարկվում են կազմակերպության անդամ բոլոր երկրներին։
«Հրավերն ուղարկվել է հայկական կողմին։ Մենք պատրաստ ենք հյուրեր ընդունել բոլոր մակարդակներում»,- ասել է Ադրբեջանի էներգետիկայի փոխնախարար, Ադրբեջանի COP29-ի գլխավոր գործադիր տնօրեն Էլնուր Սոլթանովը։
Նա նաև մեկնաբանել է ՀՀ նախագահ Վահագն Խաչատուրյանի հայտարարությունը, որ Հայաստանը ձգտում է Ադրբեջանի հետ խաղաղության համաձայնագիր ստորագրել մինչև COP29-ը, որը տեղի կունենա նոյեմբերին Բաքվում։
«Ադրբեջանում COP29-ի անցկացման որոշումը կայացվել է Ադրբեջանի և Հայաստանի փոխադարձ աջակցությամբ։ Ցանկալի է, որ այդ տեմպն արագանա, և մեր երկրների միջև կայուն խաղաղություն կնքվի։ Բայց դա պետք է լինի երկու երկրների կամքով, փոխադարձ համաձայնությամբ, փոխզիջումով»,- ասել է Սոլթանովը՝ նշելով, թե ոչ մի երկիր չպետք է չարաշահի COP29-ը՝ հանուն իր շահերի։
Հավելենք, որ հոկտեմբերի 18-ի առավոտվա դրությամբ՝ COP29 համաժողովին մասնակցելու համար գրանցվել է ավելի քան 28 հազար մասնակից։ Այս մասին հայտարարել է COP29 կազմկոմիտեի անդամ, ադրբեջանական COP29 գործող ընկերության ղեկավար Նարմին Ջարչալովան։ Նա հայտարարել է, որ գրանցվածներից մոտ 2700-ը լրատվամիջոցների ներկայացուցիչներ են, իսկ մնացածը ներկայացնում են հասարակական կազմակերպություններ, միջազգային դիտորդական կազմակերպություններ և այլն։
COP29-ը Բաքվում տեղի է ունենալու նոյեմբերի 11-ից 22-ը։
Թարգմանությունը՝ Էմմա Չոբանյանի
