09.09.2026 | 10:41
Հրդեհ Քարաբերդում․ այրվել է մոտ 700 հակ անասնակեր
Ղազախստանը չի նախատեսում միանալ BRICS-ին
Քաղաքականություն
16.10.2024 | 14:44
Ղազախստանը դեռևս չի նախատեսում միանալ BRICS-ին, թեև երկրի նախագահ Կասիմ-Ժոմարտ Տոկաևը նման առաջարկներ ստացել է։ Այս մասին TengriNews-ին ասել է Տոկաևի խորհրդական և մամուլի քարտուղար Բերիկ Ուալին։
«Ներկայում և, ամենայն հավանականությամբ, տեսանելի ապագայում Ղազախստանը զերծ կմնա BRICS-ին հայտ ներկայացնելուց, այդ թվում՝ հաշվի առնելով անդամակցության հարցը քննարկելու բազմափուլ գործընթացը, ինչպես նաև հեռանկարների հետ կապված այլ հարցեր այս ասոցիացիայի զարգացման համար»,- ասել է նա:
Ուալիի խոսքով՝ BRICS-ին միանալու առաջարկները պետության ղեկավարը դիտարկել է «Ղազախստանի ազգային շահերի տեսանկյունից»։ Այնուամենայնիվ, Տոկաևն առայժմ առաջնահերթությունը տալիս է ՄԱԿ-ին՝ «որպես համընդհանուր և ոչ այլընտրանքային կազմակերպության, որտեղ կարող են և պետք է քննարկվեն բոլոր ընթացիկ միջազգային խնդիրները», հավելել է նա։
Միևնույն ժամանակ, Ղազախստանի նախագահը հանդես է գալիս ՄԱԿ-ի Անվտանգության խորհրդի բարեփոխման օգտին՝ հիմնված ՄԱԿ-ի անդամ երկրների լայն խորհրդակցությունների վրա և հաշվի առնելով «միջին տերությունների» շահերը, քանի որ, նրա կարծիքով, այս մարմինը կորցրել է «կարևոր և ճակատագրական որոշումներ կայացնելու կարողությունը», նշել է Ուալին։
Թարգմանությունը՝ Տաթև Ֆռանգյանի
