09.09.2026 | 14:22
ԱԺ առողջապահության հարցերի մշտական հանձնաժողովի նիստը․ ՈՒՂԻՂ
Լքված նորածնին որդեգրել են
Հասարակություն
16.10.2024 | 12:34
Նախորդ տարվա մայիսին Երևանի Արցախի փողոցի ավտոտնակի հարևանությամբ հայտնաբերված նորածնին որդեգրել են։ Տեղեկությունը Factor.am-ի հետ զրույցում հաստատեց ՀՀ աշխատանքի և սոցիալական հարցերի նախարարության մամուլի քարտուղար Զառա Մանուչարյանը, նշելով՝ այլ տեղեկատվություն փոխանցելու իրավասություն չունեն։
Հիշեցնենք՝ 2023 թվականի մայիսի 11-ին Արցախի փողոցի 8/4 շենքի հարակից ավտոտնակների տարածքից նորածին երեխա էր հայտնաբերվել, որը շտապ տեղափոխվել էր «Մուրացան» հիվանդանոց։ Ընդունման պահին նրա մոտ ախտորոշվել է խորը հիպոթերմիա՝ 31 աստիճան, և շնչառական ծանր ախտանիշներ։ Ավելի ուշ Քննչական կոմիտեն հաղորդագրություն տարածեց, որ քննություն է իրականացնում ծննդկանին հայտնաբերելու, փոքրիկ ծննդյան հանգամանքները պարզելու ուղղությամբ․
«Նախաձեռնվել է քրեական վարույթ Քրեական օրենսգրքի 82-րդ հոդվածի 3-րդ մասի 3-րդ կետի հատկանիշներով, այսինքն՝ հանցավորից նյութական կամ այլ կախվածության մեջ գտնվող անձին վտանգի մեջ թողնելու հատկանիշներով, և Քրեական օրենսգրքի 247-րդ հոդվածի 1-ին մասով, որն է երեխայի դաստիարակության կամ խնամքի պարտականությունները չկատարելը կամ ոչ պատշաճ կատարելը»,- նշվում է հաղորդագրության մեջ։
Վերջին 5 տարիներին գրանցվել է ընկեցիկ երեխաների հայտնաբերման 3 դեպք՝ 2-ը 2022 թվականին, 1-ը՝ 2023 թվականին. բոլոր 3 դեպքերում երեխաները որդեգրվել են։
Ռոզա Վարդանյան
